إيهاب اتحجج إن شقته صغيرة، وعياله ماليين المكان، ومفيش عنده أوضة فاضية تستوعبها.
أما منى، بنتها، فقالت إن شقتها في الدور الرابع ومفيهاش أسانسير، وإن طلوعها ونزولها هيبقى مستحيل، خصوصًا إن صاحبة العمارة أصلًا مش بتستحمل أي دوشة أو حركة زيادة.
فضلت ساكتة وأنا بسمعها، لكن جوايا كنت بغلي.
مش قادره أفهم إزاي ست تعبت عمرها كله عشان تربي تلات أولاد، وفي الآخر لما احتاجت حد يسندها، كل واحد فيهم دور على حجة يبعد بيها عن المسؤولية.
بصيت ناحية أوضة الضيوف عندي، كانت فاضية من شهور، واللحاف متطبق فوق السرير زي ما هو من آخر مرة حد نام فيها.
مكنتش محتاجة أفكر كتير.
قلت لها بحسم:
_خلاص يا ماما، جهزي شنطة هدومك وتعالي عندي.
اتخضت من كلامي وقالت بسرعة:
_لأ يا هدى، يا بنتي ميصحش. إنتِ مش ملزمة بيا، وكفاية عليكي شغلك ومسؤولياتك.
قاطعتها وأنا بحاول أخلي صوتي حاسم:
_مفيش الكلام ده. إنتِ هتيجي تقعدي عندي لحد ما تقفي على رجلك، وده بيتك ومطرحك، ومش عايزة أسمع اعتراض.
فضلت ساكتة لحظة، وبعدها قالت بصوت مبحوح:
_ربنا يكرم أصلك يا بنتي، أنا مش هنسالك وقفتك دي طول عمري.
مكنتش أعرف وقتها إن الجملة دي هتفضل ترن في ودني كتير، وإن وجودها في بيتي هيكشفلي حكاية عمري ما كنت أتخيل إنها موجودة.
يوم الخميس، طارق جابها بنفسه.
مكنتش شفته من حوالي سنة، لكن أول ما دخل من باب الشقة، حسيت بنفس الإحساس القديم اللي كنت بحاول أنساه.
دخل وهو شايل شنطتها، وبص حوالين الصالة بنظرة سريعة، وبعدها قال بنبرة باردة:
_الشقة متغيرتش كتير يعني.
مردتش عليه، واكتفيت إني أشاور ناحية الطرقة.
_أوضة مامتك جاهزة.
حط الشنطة جنب الباب، وبص لأمه كأنه مستني منها كلمة شكر أو حتى ابتسامة.
لكن الحاجة إنعام فاجأته وهي بتقوله بنبرة حازمة:
_هدى شايلة فوق طاقتها عشاني، ومن غير ما تطلب منك أي حاجة، فخليك مقدر ده ومتعملش نفسك صاحب فضل.
طارق اتكسف، وبص في الأرض، وبعدها حاول يغير الموضوع وهو بيظبط الشنطة.
أنا كنت واقفة بعيد، ومش عايزة أفتح معاه أي كلام.
بعد كام دقيقة نزل، والحاجة إنعام فضلت واقفة ورا الستارة بتبص على عربيته لحد ما اختفت من أول الشارع.
وقتها مكنتش فاهمة ليه فضلت متابعاه بالشكل ده، ولا ليه كان في عينيها حزن أكبر من مجرد إن ابنها مشي وسابها.
ن أول يوم، بدأت أظبط الشقة على احتياجاتها.
شيلت السجادة من الطرقة عشان المشاية متتعلقش فيها، وحطيت كرسي خشب متين جنب السرير، وخليت كل الأدوية في درج قريب منها، وعلقت ورقة صغيرة بمواعيد العلاج عشان مننساش أي جرعة.
وبالليل كنت واقفة في المطبخ بعمل شوربة لسان عصفور بالفراخ، لما لقيتها قاعدة على الكرسي وبتبصلي بحزن.
قالت:
_مكنش ليه لازمة كل التعب ده يا هدى، كنتي عملتي أي أكل وخلاص.
بصيتلها وقلت بمشاكسة:
_يعني إنتِ عايزاني أسيبك من غير أكل؟ ده أنا لو عملت كده هتبقي أول واحدة تشتكيني.
ضحكت بخفة، وبعدها قالت:
_ربنا يخليكي ليا يا بنتي.
الأسبوع الأول عدى بصعوبة.
مواعيد دكاترة العظام، والأشعات، والأدوية، والغسيل، وتحضير الأكل، ومواعيد دوا السيولة والمضاد الحيوي.
والمشكلة الأكبر إن الحاجة إنعام كانت مصممة تثبتلي إنها لسه قادرة تعمل كل حاجة بنفسها.
في يوم الصبح، لقيتها بتحاول تقوم من مكانها عشان تجيب صينية الشاي.
جريت عليها وخطفت الصينية من إيديها.
_إنتِ بتعملي إيه يا ماما؟! مش اتفقنا متتحركيش لوحدك؟
بصتلي بضيق مصطنع وقالت:
_يا بنتي أنا مش معمولة من إزاز! هو أنا كل ما أمد إيدي على حاجة هتجري عليا كده؟
ضحكت وقلت:
_لأ طبعًا، إنتِ مش إزاز، بس لو وقعتي واتعورتي تاني، أنا اللي هتجنن، وبعدين السجادة جديدة ومش ناقصة شاي واقع عليها!
ضحكت من قلبها، واستسلمت في الآخر.
وبالليل، كنا بنقعد قدام التلفزيون نتفرج على مسلسلات زمان، ونفضل نعلق على الممثلين كأنهم قاعدين معانا في الصالة.
كانت ساعات تحكيلي عن أيام المدرسة، وعن المدرسات اللي اشتغلت معاهم، وعن مواقف غريبة حصلتلها مع التلاميذ.
وأنا كنت بحب أسمعها، يمكن لأنها كانت بتخليني أحس إن البيت مبقاش فاضي زي الأول.
وفي ليلة، أثناء فاصل إعلاني، لاحظت إني سرحت، وإن صوابعي بتتحرك من غير وعي على المكان اللي كانت فيه دبلتي زمان.
بصت لإيدي، وبعدها رفعت عيني لوشي وقالت بصوت واطي:
_يا ريتني كنت عرفت طارق بيعمل إيه من وراكي بدري يا هدى، مكنتش سكتله.
ابتسمت بحزن وقلت:
_مكنتيش هتقدري تمنعيه يا ماما، اللي حصل حصل، والنصيب غلاب.
هزت راسها وقالت:
_يمكن مكنتش هقدر أمنعه، بس كان ممكن أقف جنبك، ومكنتش هسيبك تشيلي الوجع ده لوحدك بالشكل ده.
