سر أم طليقي ج2 الكاتبة نرمين عادل همام
أول ما شافتني، قفلت الغطا بسرعة وخبّت العلبة جنبها.
استغربت وقلت:
_إنتِ لسه بتقلبي في الورق ده يا ماما؟
ردت وهي بتبصلي بارتباك:
_آه، شوية حاجات قديمة.
قربت منها وقلت بحسن نية:
_طب ما أساعدك نرتبهم ونشوف اللي ينفع يترمي واللي نحتفظ بيه؟
بصتلي بنظرة مختلفة، وقالت بحدة:
_لأ يا هدى، الحاجات دي بلاش تدخلي فيها.
اتجمدت مكاني.
دي كانت أول مرة من خمس سنين ترفضلي طلب بالطريقة دي، وأول مرة تكلمني بالنبرة القاسية دي.
حاولت أبتسم عشان أخفف الموقف، لكن الكلمة كانت وجعتني.
قلت:
_براحتك يا ماما، أنا كنت بس بحاول أساعدك.
خرجت من الأوضة وأنا مش فاهمة إيه اللي حصل.
دخلت البلكونة وبدأت أطبق الغسيل بعصبية، وبحاول أقنع نفسي إني مكبرة الموضوع.
أنا اللي فتحت بيتي ليها، واعتبرتها زي أمي، وشايلها فوق راسي، فليه فجأة بقيت بتعاملني كأني واحدة غريبة بتحاول تعرف أسرارها؟
ولأول مرة، السؤال اللي حاولت أتجاهله من أيام بدأ يلح عليا:
هي الحاجة إنعام بتخبي عني إيه؟ وليه كل اللي حواليها متفقين إن السر ده مينفعش أعرفه؟
بعد أربع أسابيع
الدكتور طمنا إن الكسر بدأ يلتئم بشكل كويس، وإنها تقدر ترجع شقتها، بشرط تفضل حريصة في الحركة، وتستعين بحد يساعدها في شغل البيت كام ساعة كل يوم.
طارق جه ياخدها.
ركن عربيته تحت البيت، وساب الموتور شغال، حتى متكلفش يطلع ياخد شنطتها أو يساعدها تنزل.
أنا جهزتلها حاجتها، ونزلت معاها لحد مدخل العمارة.
وقبل ما تركب العربية، لقيتها بتشدني لحضنها.
كان حضن طويل ودافي، لكن فيه رجفة غريبة، كأنها بتحاول تحفظ ريحتي وملامحي قبل ما تمشي.
قالت بصوت مبحوح:
_إنتِ متعرفيش اللي عملتيه معايا ده كبير قد إيه عند ربنا، أنا مش عارفة أوفيكي حقك إزاي يا هدى.
ابتسمت وربت على كتفها.
_عيب يا ماما، ده بيتك، وإنتِ لو كنتِ مكاني كنتِ هتعملي أكتر من كده.
بعدت عني شوية، ومسكت وشي بين إيديها، وفضلت تبصلي بتركيز غريب.
_يا هدى…
_نعم يا حبيبتي؟
اترددت، وبصت لفوق ناحية شباك أوضة الضيوف في الدور التالت.
للحظة، شفت في عينيها خوف حقيقي، خوف كأنها عارفة إن في حاجة مستنياني بعد ما تمشي.
همست بصوت مرتعش:
خلي بالك من نفسك يا بنتي، وحياتي عندك.
ابتسمت وأنا مش فاهمة سبب كلامها.
_وإنتِ كمان خلي بالك من نفسك، وطمنيني عليكي أول ما توصلي.
ركبت العربية، وطارق اتحرك بيها من غير ما يبص وراه.
فضلت واقفة لحد ما العربية اختفت عند ناصية الشارع.
طلعت شقتي، وفجأة حسيت إن البيت بقى واسع وفاضي بشكل غريب.
دخلت أوضة الضيوف عشان ألم الملايات وأحطها في الغسالة، وكنت بفك كيس المخدة لما سمعت خبط على باب المطبخ.
استغربت، لأن الوقت كان متأخر، ومكنتش مستنية حد.
روحت فتحت الباب.
لقيت أم محمد واقفة قدامي، وشكلها متغير تمامًا.
وشها شاحب، وعينيها حمرا، وفي إيديها علبة الجزم الكرتون القديمة، بنفس الشريطة الزرقا الباهتة اللي شوفتها قبل كده.
بصيت للعلبة، وبعدها رفعت عيني لوشها.
_إيه ده يا أم محمد؟ مش دي العلبة اللي كانت عند الحاجة إنعام؟
بصت ورايا، وبعدين رجعت بصتلي، وقالت بصوت واطي ومرتعش:
_ممكن أدخل يا هدى؟
اتنحيت من قدام الباب وسمحتلها تدخل.
دخلت وهي حاضنة العلبة بإيديها الاتنين، وحطتها على ترابيزة المطبخ.
وبعدها رفعت عيني ليا، وقالت جملة خلت الدم ينشف في عروقي:
_في سر كبير لازم تعرفيه عن الحاجة إنعام، والسر ده ليكي إنتِ بالذات… وهي كانت موصياني إني أسلمهولك في اليوم اللي تمشي فيه من هنا.
ساعتها بس فهمت إن علبة الجزم مكنتش مجرد كراكيب قديمة، وإن كل اللي حصل طول الأسابيع اللي فاتت كان مترتبله من زمان.
دخلت أم محمد المطبخ بخطوات تقيلة، لكنها رفضت تقعد. حطت كرتونة الجزم القديمة على الترابيزة اللي في النص، وفضلت واقفة قدامها، كأنها شايلة فوق كتافها حمل تقيل ومش عارفة تتخلص منه.
بصتلي وقالت بصوت واطي:
_حقك عليا يا هدى، سامحيني ومتزعليش مني.
قلبي اتقبض، وبصيتلها بقلق:
_في إيه يا أم محمد؟ الحاجة إنعام كويسة؟ حصلها حاجة؟
هزت راسها بسرعة:
_لأ يا بنتي، بخير وزي الفل، متقلقيش عليها.
وبعدها قربت مني ووطت صوتها أكتر، رغم إن الشقة مكنش فيها حد غيرنا.
_بس فيه حاجة لازم تعرفيها، ومكنش ينفع أفضل مخبياها عنك أكتر من كده.
بصيت للكرتونة، وبعدها رجعت بصيتلها.
_حاجة إيه؟
أخدت نفس طويل وقالت:
_الحاجة إنعام مكنتش جاية تعيش عندك بالصدفة، هي كانت مرتبة كل خطوة من الأول.
