بصيتلها وقلت:
_كفاية إنك صدقتيني لما جيت وحكيتلك، دي عندي بالدنيا.
ساعتها سكتت، وحطت طبق الفشار على الترابيزة من غير ما تاكل منه.
فضلت باصة قدامها، وعينيها فيها حاجة مش مفهومة.
افتكرت إنها بس رجعت تفتكر أيام طلاقي من طارق، وإن الذكريات وجعتها زي ما وجعتني.
لكن الحقيقة إن الحاجة إنعام مكنتش بتفتكر الماضي وبس.
كانت شايلة سر كبير، سر مخبياه عن الكل، حتى عن أولادها.
والأغرب من السر نفسه، إنها كانت مستنية الوقت المناسب عشان تكشفهولي.
ومن يومها، بدأت أفهم إن أسئلتها الكتير عن مواعيد رجوعي من الشغل، ونظراتها ناحية باب الشقة، ومكالماتها اللي كانت بتقفلها أول ما أدخل عليها، مكنتش تصرفات عادية أبدًا.
مع بداية الأسبوع التاني، بدأت ألاحظ إن الحاجة إنعام بقت تسألني عن مواعيد خروجي ورجوعي بشكل متكرر، وبحرص غريب.
_هتنزلي الشغل الساعة كام يا هدى؟
_وهترجعي النهارده على معادك ولا عندك مشوار؟
_طب بكرة هتتأخري برضه؟
في الأول كنت بفتكر إنها عايزة تعرف مواعيدي عشان متفضلش مستنياني، أو يمكن عشان تظبط يومها على وجودي في البيت.
وقلت لنفسي إن الست تعبانة، ومحتاجة شوية خصوصية وهدوء، ويمكن وجودي المستمر حواليها مخليها مش عارفة تاخد راحتها.
لكن اللي حصل يوم الأربع خلاني أبدأ ألاحظ حاجات مكنتش واخدة بالي منها.
كان عندي ميعاد مع دكتور الأسنان في الشغل، واتلغى فجأة، فقررت أرجع البيت بدري. بدل ما أوصل الساعة خمسة ونص زي كل يوم، فتحت باب الشقة بالمفتاح الساعة تلاتة إلا ربع.
أول ما دخلت، سمعت صوت حركة جاية من أوضة الضيوف.
دخلت لقيت الحاجة إنعام قاعدة على السرير، وفاردة قدامها مجموعة كبيرة من الورق الأبيض، وبعض الأوراق القديمة اللي لونها مصفر.
وأول ما سمعت صوت المفاتيح، اتصرفّت بسرعة غريبة، ولمّت الورق وغطته بمجلة كانت جنبها، كأنها بتخبي ورق كوتشينة ومش عايزة حد يشوفه.
رفعت عينيها ليا بارتباك وقالت:
_هدى! إنتِ جيتي إمتى؟ مش معقول، أنا خالص مكنتش متوقعة ترجعي دلوقتي!
ابتسمت وأنا ببص ناحيتها باستغراب.
_الميعاد اتلغى، فقلت أرجع أرتاح شوية.
جنب السرير، على الكومودينو، لفت نظري صندوق كرتون قديم بتاع جزم رياضية، حالته كانت متبهدلة، وأطرافه متقطعة، ومربوط بشريطة زرقا باهتة شكلها أكل عليه الزمن
شاورّت عليه وسألتها:
_إيه العلبة القديمة دي يا ماما؟
اتلخبطت وهي بترد:
_دي؟ دي شوية ورق وكراكيب قديمة تخصني.
وبعدها مدت إيدها ناحية المشاية وقالت بسرعة:
_معلش يا بنتي، تعمليلنا كوبايتين شاي بالنعناع؟ نفسي أشرب حاجة سخنة.
هزيت راسي ودخلت المطبخ.
بس وأنا بستنى المية تغلي، فضلت أفكر في طريقتها وهي بتخبي الورق.
الغريب إنها من ساعة ما دخلت وأنا بكلمها، مرفعتش عينيها في عيني ولا مرة.
أما الشريطة الزرقا، فكان فيها حاجة مألوفة بالنسبة لي، حاجة شوفتها قبل كده، لكن مش قادرة أحدد فين وإمتى.
تاني يوم العصر
كنت راجعة من مشوار، ولمحت أم محمد جارتي وهي خارجة من باب العمارة الحديد، وفي إيدها كيس قماش تقيل، ملفوف بإحكام حوالين حاجة شكلها مستطيل.
ناديت عليها:
_خير يا أم محمد؟ رايحة فين كده؟
اتخضت ووقفت مرة واحدة، لدرجة إن الكيس خبط في ركبتها.
_يا ساتر! إزيك يا هدى؟
ابتسمت وقلت:
_الحمد لله، إنتِ عاملة إيه؟
ردت وهي بتبص ناحية باب شقتي:
_الحمد لله يا بنتي، دي الحاجة إنعام كانت وصتني أجيبلها شوية حاجات من الصيدلية والسوق.
_كتر خيرك، ربنا يباركلك.
هزت راسها بسرعة، وبصت ناحية شباك أوضة الضيوف، وبعدها دخلت شقتها اللي قصادي وقفلت الباب وراها.
فضلت واقفة مكاني ثواني.
أم محمد عندها ستة وستين سنة، وكانت ممرضة على المعاش، ومن أكتر الناس اللي بحترمهم في العمارة. لكن عمري ما شوفتها بتتحرك بالسرعة دي، ولا بتتلخبط في الكلام بالشكل ده.
حاولت أطرد الأفكار الغريبة من دماغي.
أكيد مفيش حاجة، وأنا اللي بقيت بدقق زيادة عن اللزوم.
لكن الأيام اللي بعدها أثبتتلي إن الموضوع مكنش مجرد صدفة.
كل ما كنت أرجع البيت فجأة من غير ما أبلغ الحاجة إنعام، ألاقيها مرتبكة، وأحيانًا ألاقي أم محمد قاعدة معاها، وأول ما أدخل يسكتوا مرة واحدة ويغيروا الموضوع.
كنت بحس إن في حاجة بيخبّوها عني، حاجة تخصني أنا بالذات، لكن مش فاهمة إيه هي.
بعدها بليلتين
صحيت حوالي الساعة واحدة بعد نص الليل على صوت غريب جاي من الطرقة.
صوت عجلات المشاية وهي بتتحرك ببطء فوق الباركيه.
فتحت باب أوضتي بهدوء، وبصيت من بعيد.
لقيت الحاجة إنعام واقفة في نص الصالة، وإيديها الاتنين ماسكين صندوق الجزم الكرتون القديم، وحاطاه فوق الرف البلاستيك الصغير اللي في المشاية.
