
لما وصلوا للغردقة، الفيلا كانت قطعة من الجنة. مبنية على صخرة بتطل على البحر الأحمر مباشرة، المكان كان هدوءه بيغني للروح. بمجرد ما دخلوا، الحراس انتشروا في كل زاوية، والفيلا اتحولت لقلعة بتبص على الزرقة الصافية.
طارق دخل الأوضة الرئيسية، قعد على الكرسي المطل على البحر، وخد نفس عميق، الهوا كان مليان ريحة ملح ورطوبة بحر منعشة. نرمين دخلت عليه، حطت إيدها على كتفه، وبصت معاه للبحر: “الوعد ده، وعد السكينة.. مفيش صراعات، مفيش فريدة، مفيش أدهم، مفيش غيرنا إحنا وبس.”
طارق مسك إيدها، وباس كفها بامتنان: “هنا، بعيد عن العالم، هقدر أرجع أكون السند اللي أنتي تستاهليه يا نرمين. هتعالج، وهسترد صحتي، وهنربي يوسف بعيد عن ضجيج الانتقام. هنا بس، طارق الشاذلي هيبدأ حياته الحقيقية.”
نرمين سندت راسها على كتفه، ويوسف كان نايم في أوضته، والهدوء كان بيغلف الفيلا. في اللحظة دي، طارق حس لأول مرة إن “الخسارة” الحقيقية كانت هتكون لو كان استسلم للغيبوبة، لأن الحياة في حضن نرمين، حتى لو كانت بعيدة ومخبية، هي الثروة الحقيقية اللي مفيش “أدهم” ولا غيره يقدر يقدر تمنها.
طارق غمض عينه وهو بيسمع صوت الموج، وهمس: “بداية جديدة يا نرمين.. بداية مفيش فيها غيرنا.” انجى الخطيب
من أول يوم، طارق قرر إنه يقفل صفحة “طارق الشاذلي رجل الأعمال والانتقام” ويفتح صفحة “طارق الزوج والأب”.
كان بيقضي يومه في الهدوء، بيمشي على الشط مع نرمين وقت الشروق، بيحاول يستعيد عافيته. نرمين كانت هي السند، كانت بتغير له على جروحه بحنان ينسيه ألمه، وبتحضر له أكله المفضل، وكانوا بيقضوا سهراتهم في التراس، بيشوفوا يوسف وهو بيحاول يمشي خطواته الأولى على الرمل.
في ليلة من الليالي، كان الجو ساحر، النجوم منورة السما والبحر هادي. طارق كان قاعد على كرسي مريح، ونرمين قعدت قدامه، مسكت إيده وقالت بهمس: “عارف يا طارق؟ أنا ساعات بقرص نفسي عشان أتأكد إني مش في حلم. بعد كل اللي شوفناه، إحنا هنا.. سوا.”
طارق سحبها قعدها جنبه على الكرسي، وضمها لحضنه: “ده مش حلم يا نرمين.. ده الواقع اللي كنت بحارب عشان أوصل له. كل ضربة جرح أخدتها، كانت تمن عشان اللحظة دي.. لحظة السكينة معاكي.”
نرمين لفت إيديها حوالين رقبته وبصت في عينيه: “أنا مش عايزة أكتر من كدة. عايزة يوسف يكبر قدامنا، وعايزاك أنت دايماً جنبي، من غير ما أخاف إن تليفونك يرن بمصيبة جديدة.”
طارق ابتسم بصدق، لأول مرة كانت ابتسامته صافية تماماً من غير أي غموض: “أوعدك، حياتنا من النهاردة ملك لينا. الشغل، الصفقات، حتى العداوات.. كلها بقت في الماضي. دلوقتي أنا طارق بتاعك وبس.”
في الجنينة برة، كان حراس الشاذلي بيه واقفين في صمت، بيراقبوا المكان بدقة، مش بس بيحموا الفيلا، دول كانوا بيضمنوا إن مفيش “ذرة قلق” توصل لطارق أو نرمين.
الشاذلي بيه كان مدي تعليمات بإن الفيلا تكون “قلعة”، بس قلعة مريحة وهادية.
يوسف كان نايم في أوضته، وطارق ونرمين لوحدهم في اللحظة دي. طارق قام وقف بصعوبة بسيطة، مسك إيد نرمين وقامها، وشغل موسيقى هادية جداً على الموبايل، وبدأ يرقص معاها رقصة بطيئة على صوت أمواج البحر.
نرمين كانت غرقانة في عينيه، ورقصوا وكأن مفيش عالم تاني غير التراس ده. طارق قرب منها وهمس في ودنها: “بحبك يا نرمين.. أكتر ما كنت متخيل إني ممكن أحب حد في حياتي.”
نرمين ردت عليه وهي بتحط راسها على صدره: “وأنا بعشقك.. أنت مش بس جوزي، أنت الحياة اللي رجعت لي.”
كانت ليلة هادية، ليلة بداية جديدة، حيث الملح كان في البحر بس، والدموع كانت دموع فرح، والوحيد اللي كان بيطارد طارق دلوقتي هو ضحكات يوسف اللي بدأت تصحى من النوم وتناديهم.
طارق ونرمين سابوا كل حاجة وراهم، ولقوا في حضن بعض الأمان اللي كانوا بيدوروا عليه طول العمر.
يتبع في البارت الرابع، بحبكوا جدا كدا. انجى الخطيب
الجزء الرابع
“يا بنتي تعالي جنبي هنا.. قربي كمان.. ايوة نامي بقى على بطنك عشان محدش يشوفنا..” نرمين رجعت من برا كانت بتدي يوسف تطعيماته الدورية، دخلت الفيلا وهي مرهقة، يوسف نام في حضن المربية، فقررت تدخل أوضة النوم عشان ترتاح وتطمن على طارق اللي كان بيقضي أغلب وقته في الراحة عشان يكمل شفاءه….
وهي بتقرب من باب الأوضة، سمعت صوت طارق بيتكلم بنبرة ناعمة ومغرية جداً وهو بيقول: “يا بنتي تعالي جنبي هنا.. قربي كمان.. ايوة نامي بقى على بطنك عشان محدش يشوفنا..”
الدنيا دارت بنرمين، دمها غلي وعقلها صور لها ألف خيانة وخيانة.
طارق؟ الشخص اللي لسه مخلصين معركة عشانه؟ اللي كانت هضحي بروحها عشانه بيخونها…… طارق اللي بيحبها لحد الجنون يعمل كدا فيها؟
نرمين كانت هتجنن، مستحملتش غيرتها، مفيش في قاموسها تفاهم في المواقف دي، زقت باب الأوضة بكل قوتها لدرجة إن الباب خبط في الحيطة بصوت مرعب!
“مين دي يا طااارق؟! يا خاين يا غدار!” صرخت نرمين وهي بتدخل زي الإعصار، مستعدة تطير اي حد قدامها وداخلة تجسب البت اللي معاه من شعرها، وهنا كانت المفاجأة.
طارق اتفزع، الموبايل طار من إيده، وشه أصفر من الخضة، ونزل من على السرير وهو بيحاول يداري الموبايل اللي لسه شغال: “نرمين! في إيه؟ إنتي اتجننتي؟ عايزة تموتيني؟”
نرمين بصت في كل ركن في الأوضة، مفيش حد! طارق واقف قدامها لابس بنطلون بيجامة وصدره عريان، يعني كان معاه واحدة، بس هي فين؟ مش لاقياها، طارق مزهول وعينيه بتبرق من الصدمة.
نرمين بصت للموبايل اللي واقع على السرير، قالتله: “اااه انت بتكلمها فيديو كول بقي، هي دي الطريقة الجديدة بتخوني أون لاين يا طارق” وجريت عشان تمسك الفون… كل دا وطارق مش عارف يعمل ايه ومذهول وملحقش يمسك الفون في الوقت اللي نرمين جريت علي الفون ومسكته في ايدها وبتبص علي شاشة الفون لاقت…..
لاقت لعبة مفتوحة ومكتوب “PUBG”. هنا.



