وفجأة، جرس الإنذار في الغرفة ضرب بقوة، والأجهزة بدأت تصفر.. الدكتور دخل جري، والممرضين أبعدوا نرمين عن السرير.. طارق بدأ يتشنج، وعيونه بدأت تغيب تاني!
الدكتور صرخ: “نرمين هانم، لازم تخرجي فوراً! القلب بيقف!”
نرمين وقفت برة، بتبص من إزاز الأوضة وهي بتموت، وبتدعي: “يا رب.. يا رب متحرمنيش منه بعد كل ده!”
جوه الأوضة، الدكتور بيحاول يعمل صدمات كهربائية لقلب طارق، والزمن وقف.. هل دي فعلاً “الخطة التانية” اللي أدهم سابها؟ وهل طارق هيقدر يرجع المرة دي من الغيبوبة، ولا دي فعلاً النهاية؟ انجى الخطيب ………..
طارق فتح عينه ببطء شديد، النور كان بيخترق عينيه زي الخناجر، حاسس بضبابية ورؤية مشوشة، لكن أول حاجة استقرت عليها عينيه كانت ملامح نرمين، اللي كانت وشها غرقان دموع لكن عينيها بتلمع ببريق الأمل اللي مبيعرفش المستحيل.
المونيتور اللي كان بيصرخ بخط مستقيم، بدأ يغني دقاته المنتظمة “تيك.. تيك.. تيك”، دقات رجعت للحياة وكأنها بتعلن انتصار الحب على الغيبوبة.
الدكاترة كانوا في حالة ذهول، بيتبادلوا نظرات مش مصدقين، واحد منهم مسح عرقه وقال بصوت متهدج: “دي.. دي حالة طبية نادرة جداً، الجسم كان في حالة سكون عميق لدرجة إن الأجهزة فشلت في رصده.. نرمين هانم، إيمانك وإصرارك هما اللي خلونا مخرجش من الأوضة!”
نرمين مكنتش سامعة كلمة واحدة، كانت عيونها محبوسة في عينين طارق، سابت إيده اللي كانت بتنبض تحت إيديها وبدأت تضغط عليها بلطف، طارق حاول يبتسم، بس ابتسامته كانت تعبانة، أنفاسه لسه تقيلة.
رفع إيده التانية ببطء شديد ولمس وش نرمين، صوت أنفاسه كان مسموع في الأوضة الهادية: “نـ.. نرمين؟”
الكلمة كانت طالعة خشنة ومتقطعة، لكنها كانت أحلى لحن سمعته نرمين في حياتها. غطت إيدها على إيده وبكت بهستيريا، بس المرة دي دموع فرحة لا توصف: “أنا هنا.. أنا هنا يا حبيبي، مسبتكش، عمري ما هسيبك، كنت عارفة إنك هترجعلي، كنت عارفة إن ربنا مش هيخذل قلبي!”
طارق بصلها بنظرة فيها كل العشق اللي بيحمله، حاول يتكلم تاني بس الدكتور قاطعه: “طارق بيه، ارجوك، متتكلمش دلوقتي، جسمك محتاج راحة، إنت عملت معجزة حقيقية، سيب جسمك يستعيد طاقته.”
طارق مخدش عينه من على نرمين، مسك إيدها بقوة أكتر وكأنه بيستمد منها القوة، غمض عينه تاني وهو بيتنفس بانتظام، لكن إيده كانت لسه ماسكة إيد نرمين، كأنه بيقولها “أنا رجعت، ومستحيل أبعد تاني”.
نرمين بصت للدكاترة، وقفت ووقفت وراها كل قوتها اللي رجعتلها تاني: “محدش يلمسه.. أنا هفضل جنبه، مش هتحرك من هنا، طارق محتاجني جنبه عشان يكمل شفاءه.”
عمر كان واقف عند باب الأوضة، كان ساند على الحيطة وبيمسح دموعه بكم قميصه، دخل ووقف جنب نرمين، حط إيده على كتفها وقال بصوت مليان احترام: “طارق مش بس رجع، طارق رجع عشان أنتي اللي كنتِ بتناديه يا نرمين. مفيش قوة في الدنيا كانت تقدر تاخده منك طول ما إنتِ متمسكة بيه كدة.”
في اللحظة دي، طارق فتح عينه مرة تانية، وبص لعمر بابتسامة باهتة بس واثقة: “أنا.. ممتش يا عمر.. أنا كنت في مكان، المكان ده كان فيه نرمين بس.. رجعت عشان أوفي بوعدي ليها.”
نرمين مالت عليه، وبست جبينه برقة: “الوعد ده هو اللي رجعك، والوعد ده هو اللي هيخلينا نعيش بقية عمرنا سوا.. نام يا بطل، ارتاح، أنا جنبك، ومفيش أي قوة في الأرض تقدر تاخدك مني تاني.”
الأوضة بدأت تهدى، الدكاترة خرجوا، والأنوار خفتت، نرمين قعدت على طرف السرير، ضمت إيد طارق لقلبها، وغمضت عينيها، لأول مرة من ساعات، كانت بتتنفس بحرية، والروح اللي كانت ميتة فيها رجعت للحياة مع كل نبضة قلب لطارق.
الغرفة بقت عالم صغير، مفيش فيه غير اتنين، الغياب خاف يقرب منهم لأن حبهم كان أقوى منه بكتير. ………….
مرت الأيام في المستشفى وكأنها دهر، لكن عزيمة طارق في الشفاء كانت أسرع من توقعات الأطباء، وكأن وجود نرمين بجانبه كان “إكسير” الحياة اللي بيضخ العافية في عروقه.
بمجرد ما سمح له الدكتور بالخروج، كان طارق واقف على رجله، بيسند على كتف نرمين اللي كانت بتتحرك معاه كأنها جزء من روحه.
في الطريق للبيت، طارق كان باصص من شباك العربية، ملامحه هادية بس عيونه كانت بتفكر في شيء أعمق.
نرمين مسكت إيده وقالت بهدوء: “أنا عارفة اللي بتفكر فيه.. أنت عايز تهرب بيهم من هنا، صح؟”
طارق لف لها وبص في عينيها: “مش هروب يا نرمين، ده إعادة ترتيب. أنا محتاج مكان مفيش فيه ريحة صراعات ولا وجع مستشفيات.. محتاج مكان ألملم فيه شتات نفسي وأرجع أكون طارق اللي أنتي تعرفيه، طارق اللي مبيخافش على عيلته.”
في اللحظة دي، تليفونه رن، كان الشاذلي بيه. طارق فتح السبيكر، وصوت أبوه القوي والدافئ وصلهم: “يا طارق يا ابني، أنا عارف إنك بتفكر في ده.. مش عايزك ترجع البيت ولا تقرب من مكاتب الشركة. أنا جهزتلك الفيلا بتاعتك اللي في الغردقة، الفيلا دي حصن، بعيدة عن أي حد، ومحدش يعرف مكانها غيري أنا. كل حاجة مجهزة ليك ولنرمين ويوسف، وفي فرقة حراسة خاصة من أقوى رجالتي موجودين هناك عشان يأمنوا المكان 24 ساعة. روح هناك، كمل علاجك، وخد وقتك في الاستشفاء.. الغردقة هي المكان الوحيد اللي هتقدر فيه تلاقي هدوءك.”
طارق حس براحة لأول مرة: “شكراً يا والدي.. أنا محتاج ده فعلاً.”
نرمين بصت لطارق والابتسامة رجعت لوشها: “الغردقة؟ البحر والشمس؟ ده أحلى قرار خدناه.” ……… انجى الخطيب
في نفس اللحظة، طارق ونرمين ويوسف كانوا بيتحركوا في موكب تأمين سري للمطار. الموكب كان ماشي بخطة محكمة، الحراس كانوا في كل مكان، والسرية كانت مفروضة على كل خطوة. بمجرد ما طارت الطيارة الخاصة بيهم، طارق حس إن قيود الماضي بدأت تتفكك.
