أنا مش بطلب منك حاجة. قامت من مكانها وقالت: ـ بالعكس، إنت طلبت كتير من غير ما تحس، وطلبت مني أقبل وجودك في حياتي رغم إنك جوز واحدة صاحبتي. ومشيت وسابتني قاعد مكاني، ولأول مرة أحس إن البنت اللي كنت فاكر إني قدرت ألفت نظرها، شايفاني شخص تافه وسطحي، وده بدل ما يخليني أراجع نفسي، خلاني أفكر إزاي أخليها تغير فكرتها عني.
رجعت البيت وأنا متضايق، وكل اللي شاغل دماغي كلامها. كنت متوقع إنها تفرح باهتمامي، أو على الأقل تحس إنها مميزة عندي، لكن طريقتها استفزتني. دخلت لقيت حور بتجهز الغدا، وأول ما شافتني ابتسمت وقالت:
ـ إيه يا حبيبي، اتأخرت ليه النهارده؟
بصيتلها وابتسمت بالعافية، وقعدت جنبها، ولقيت نفسي بقارن بينها وبين صاحبتها. حور طيبة وحنينة ومفيش منها اتنين، لكن البنت التانية كان فيها حاجة شدتني، ثقتها في نفسها وطريقتها في الكلام وحتى رفضها ليا كان مستفزني.
فضلت يومين أراقب صفحتها من بعيد، لحد ما لقيتها منزلة بوست بتتكلم فيه عن الرجالة اللي بتفتكر إن الفلوس والهدايا والوعود ممكن يشتروا بيها أي ست. حسيت إنها بتتكلم عني، فبعتلها رسالة:
ـ واضح إنك واخدة فكرة وحشة عني.
ردت بعد شوية:
ـ مش واخدة فكرة، أنا بحكم على تصرفاتك. كتبتلها:
ـ طب اديني فرصة تعرفيني بدل ما تحكمي عليا. ردت:
ـ إنت مش محتاج فرصة تعرفني، إنت محتاج فرصة تفهم إنك متجوز، وإن مراتك مش لعبة في إيدك تزهق منها وتدور على صاحبتها.
الكلام ضايقني، خصوصًا إنها جابت سيرة حور، فقلتلها:
ـ أنا وحور بينا مشاكل كتير، وإنتِ متعرفيش حاجة عن حياتنا. ردت بمنتهى الثبات:
ـ حتى لو عندك ألف مشكلة معاها، حلها معاها، إنما متستخدمش مشاكل جوازك مبرر عشان تدخل حياة واحدة تانية.
قفلت المحادثة، وفضلت أبص في كلامها وأنا حاسس إني لأول مرة أقابل واحدة مش عارفة أضحك عليها بكلمتين حلوين، لكن اللي ماكنتش أعرفه إن حور بدأت تلاحظ انشغالي بالموبايل وتغير طريقتي معاها، وكانت مستنية اللحظة المناسبة عشان تسألني عن اللي مخبيه عنها.
في اليوم التالت كنت قاعد مع حور، وفجأة لقيتها بتقولي:
ـ مالك يا حبيبي؟ إنت متغير بقالك كام يوم، حتى وإنت قاعد معايا مش بتبصلي. قولتلها وأنا ببص في الموبايل: ـ مفيش، شوية مشاكل في الشغل. قالتلي: ـ طب ما تحكيلي، أنا مراتك ولازم أكون عارفة اللي مضايقك.
ابتسمت وقلتلها: ـ مفيش حاجة تستاهل تقلقي نفسك بيها. لكن في اللحظة دي جالي إشعار برسالة، وأول ما فتحت الموبايل ظهر اسم صاحبتها على الشاشة. حاولت أقفل بسرعة، لكن حور كانت شافت الاسم. سألتني: ـ مين دي؟قلتلها بارتباك: ـ واحدة بتسأل على حاجة تخص الشغل.
بصتلي باستغراب وقالت: ـ صاحبتك دي اسمها إيه؟قلتلها: ـ وإنتِ مالك يا حور؟ هو تحقيق؟سكتت شوية وبعدين قالت: ـ لأ، بس الاسم ده أنا عارفاه كويس، دي صاحبتي اللي كانت في الحنة، صح؟حسيت إن الأرض بتنسحب من تحتي، لكن حاولت أتماسك وقلتلها: ـ إنتِ مكبرة الموضوع ليه؟
