الساعة كانت واحدة وربع بعد نص الليل، وأنا قاعدة على طرف السرير، قدامي شنطة السفر اللي حماتي حطت فيها المصېبة بإيديها، وبسمع تسجيل المكالمة اللي بينها وبين كريم للمرة التالتة.
كل مرة كنت بسمع صوت جوزي وهو بيقول المهم إنها ما توصلش للاجتماع ده، كنت بحس إن قلبي بيتقطع من جوايا.
سبع سنين جواز، وكنت فاكرة إن مهما حصل بينا، عمره ما هيوصل إنه يسلمني بإيده للشرطة في قضية ملفقة.
لكن واضح إن الفلوس بتكشف حقيقة ناس كتير، حتى أقرب الناس ليك.
بعت التسجيل للمقدم أحمد، وبعد حوالي عشر دقايق اتصل بيا تاني.
قال بجدية بصي يا أستاذة هالة، إحنا مش هنتحرك بشكل عشوائي. أنا محتاجك تفضلي هادية، وماتلمسيش أي حاجة موجودة في الشنطة. فريق مننا هيتعامل مع الموضوع بشكل قانوني، وإنتِ ماتخرجيش من البيت لوحدك.
سألته طب والحاجة اللي حطوها؟ ممكن تكون إيه؟
رد مش هنفترض حاجة قبل الفحص، لكن واضح إن فيه محاولة لتوريطك. والأهم عندنا دلوقتي نحافظ على الأدلة.
قفلت معاه، وقررت أعمل نفسي نايمة تاني.
لكن النوم كان مستحيل.
الساعة اتنين ونص، سمعت صوت كريم وهو داخل البيت. كان بيتكلم في التليفون، وصوته عالي شوية.
قال أنا مش فاهم إنتِ مستعجلة ليه يا ماما؟ ما إحنا اتفقنا إن البلاغ يتعمل الصبح.
سمعت نادية بترد أنا مش مطمنة. البنت دي بقالها فترة بتراجع الحسابات، ولو وصلت للاجتماع هتفضحنا كلنا.
كريم قال بعصبية ما هو علشان كده لازم الموضوع يخلص. إنتِ فاكرة إني هسيبها تاخد الشركة مني؟ دي الشركة أنا اللي بنيتها واشتغلت فيها.
نادية ردت الشركة دي أبوكي اللي كان عايزها ليك، مش علشان واحدة غريبة تيجي في الآخر وتاخد أغلب الأسهم.
ابتسمت بسخرية وأنا ورا الباب.
غريبة؟
أنا اللي كنت بشتغل مع والدي من قبل ما أعرف كريم أصلًا، وأنا اللي ساعدت في تأسيس فرعين من فروع الشركة، وأنا اللي اتنازلت عن فرص كتير في شغلي علشان أساعد جوزي يبني مستقبله.
والأغرب إنهم كانوا بيتكلموا عن حقي كأنه سړقة منهم!
قمت بهدوء وفتحت اللابتوب، وبدأت أراجع الملفات اللي جمعتها خلال الشهور اللي فاتت.
كان عندي كشوف تحويلات بنكية، وفواتير لشركات وهمية، وعقود خدمات بمبالغ خيالية، ومراسلات بين كريم ومدير الحسابات السابق.
ومن وسط الملفات، لقيت مستند كان سبب كل اللي حصل.
تحويل بمبلغ 18 مليون جنيه لشركة اسمها لوسون للاستشارات السياحية، واللي اكتشفت إنها متسجلة باسم شخص قريب من حماتي.
والتحويل ده كان مجرد جزء من شبكة تحويلات أكبر، مجموعها وصل لحوالي 120 مليون جنيه.
لكن فيه حاجة كانت ناقصة.
كنت عارفة إن كريم مش بالغباء اللي يخليه يسرق المبلغ ده كله من غير ما يحتفظ بدليل يضمن بيه حماية نفسه.
فتحت
