أول ما سمعت صوت الدكتور، مريم استخبت ورايا، وكانت ماسكة في فستاني بإيديها الصغيرة لدرجة إني حسيت إنها هتقطعه من شدة خوفها. آسر لاحظ تصرفها، فبص ناحية السلم باستغراب وقال:
“إيه يا مريم؟ إنتِ خايفة من الدكتور سامح ليه؟ ده الدكتور اللي بيعالجك يا حبيبتي!”
لكن مريم هزت راسها بعنــ,,ـــــف، وفضلت مستخبية ورايا. دخل الدكتور سامح الصالون، وكان راجل في أواخر الأربعينات، لابس بدلة غالية وماسك شنطة جلد سودا. ابتسم أول ما شاف آسر وقال: “صباح الخير يا أستاذ آسر، معلش اتأخرت عليك، كان عندي حالة طارئة في المستشفى.
”
آسر رد عليه: “ولا يهمك يا دكتور، تعالى شوف مريم، بس في حاجة غريبة حصلت النهارده.”
الدكتور بص ناحيتي وسأل: “مين دي؟”
آسر قال: “دي ملك، جاية تقدم على شغل مربية لمريم.”
الدكتور رفع حاجبه وقال: “مربية؟ هو إحنا ناقصين تجارب جديدة على البنت؟”
اتدخلت وقلت بهدوء: “أنا مش بجرب حاجة يا دكتور، أنا بس قدرت أتواصل معاها.”
ابتسامته اختفت فجأة. قال بسرعة: “تتواصلي معاها إزاي؟”
قلت: “بلغة الإشارة.”
الدكتور سكت ثواني، وبعدين بص لمريم وقال بنبرة حادة: “مريم، تعالي يا حبيبتي.”
البنت الصغيرة فضلت مكانها، ومتمسكة فيا أكتر.
الدكتور قرب منها ومد إيده، لكن مريم رجعت لورا وبدأت تعيط. آسر وقف بسرعة وقال: “استنى يا دكتور، البنت خايفة، سيبها براحتها.”
الدكتور رجع خطوتين وقال: “دي أعراض نفسية معروفة يا أستاذ آسر، البنت بتتعلق بأي شخص جديد، وده جزء من الحالة.
”
لكن أنا كنت مركزة في إيده. لاحظت إنه كل ما يقرب من مريم، صوابعه بتتحرك ناحية جيب الجاكيت، كأنه بيتأكد إن حاجة معينة لسه موجودة معاه. وبعد ما الدكتور خرج من الصالون علشان يرد على مكالمة، مريم شدتني من إيدي وبدأت تعمل إشارات بسرعة.
قالتلي:
“هو بيجيلي بالليل… بيديني دوا مر… وبيقولي لو حكيت لبابا هيموّت الأرنب بتاعي.”
حسيت بقلبي بيتعصر. بصيت للأرنب اللي في حــ,,ـــــضنها، وفهمت ليه كانت متمسكة بيه بالشكل ده. سألتها: “هو اللي بيعمل كده؟”
هزت راسها.
وبعدين أشارت ناحية الدور التاني وقالت:
“في أوضة ماما… هو بيخبي حاجة هناك.”
وقفت مش عارفة أتصرف إزاي. آسر كان أب مكسور، وميقدرش يتخيل إن الدكتور اللي ائتمنه على بنته ممكن يكون بيأذيها. لكن ماينفعش أتهم حد من غير دليل.
قربت من آسر وقلتله: “يا أستاذ آسر، أنا محتاجة أطلب من حضرتك طلب.”
قال: “اتفضلي.”
“عايزة أقعد مع مريم لوحدنا شوية، من غير دكتور ولا أي حد يدخل علينا.”
بصلي باستغراب وقال: “مفيش مشكلة، بس ليه؟”
قلت: “علشان البنت محتاجة تحس بالأمان، ومحتاجة تعرف إن محدش هيجبرها تعمل حاجة مش عايزاها.”
وافق آسر، وطلب من الخدم يجهزوا أوضة مريم. لكن قبل ما أطلع معاها، سمعت صوت داليا من ورايا:
“آسر، ممكن تيجي معايا دقيقة؟ في موضوع مهم لازم تعرفه عن البنت اللي جبتها.
”
بصتلها، لقيتها متوترة بشكل غريب. آسر رد: “مش دلوقتي يا داليا.”
قالت بصوت واطي: “الموضوع يخص ملك، وأنا متأكدة إنك هتغير رأيك لما تعرف هي مين.”
اتجمدت مكاني. أنا عمري ما شفت داليا قبل النهارده، ولا عمري اشتغلت في القصر ده. إزاي بقى عندها معلومات عني؟
آسر بصلي، وبعدين بص لأخته وقال: “قولي اللي عندك.”
داليا قربت منه وهمست في ودنه بكلمتين. وفجأة ملامحه اتغيرت تمامًا. بصلي بنظرة مختلفة، وسألني بصوت بارد:
“ملك محمود… إنتِ كنتِ بتشتغلي فين من أربع سنين؟”
قلبي وقع.
لأن السؤال ده رجعني لليلة وفــ,,ـــــاه أبويا، والسر اللي فضلت مخبياه طول السنين اللي فاتت. وقبل ما أقدر أجاوبه، داليا طلعت من شنطتها صورة قديمة وحطتها قدامي. كانت صورة أبويا!لكن الصدمة الحقيقية مش كانت في الصورة.
..الصدمة كانت في الشخص اللي واقف جنبه، واللي كان ماسك إيده وبيبتسم للكاميرا. كان آسر الجبالي نفسه، وهو لسه شاب!#حكايات_شروق_خالد#حصري
فضلت باصة للصورة ومش قادرة أصدق اللي عيني شايفاه. إيدي كانت بتترعش، وقلبي بيدق بسرعة رهيبة.
الصورة كانت قديمة، واضح إنها متصورة من حوالي عشر سنين، وأبويا واقف فيها جنب آسر، والاتنين بيضحكوا وكأنهم أصحاب عمر. رفعت عيني وبصيت لآسر وقلت بصوت متقطع:
“حضرتك تعرف أبويا منين؟”
آسر فضل ساكت شوية، وبعدها أخد الصورة من إيد داليا وبص فيها بحزن.
