مرت الأيام، وليلى بدأت تستعيد صحتها، وكانت أمي وأختي معاها في كل خطوة، خصوصًا إن أختي اتفقت مع محامي يتولى إجراءات الطلاق ويحفظ لها حقوقها وحقوق ابنها. ليلى في البداية كانت مترددة، وكل شوية تقول إنها مش عايزة مشاكل، لكن أختي كانت بتفهمها إن ده مش انتقام من سامح، دي حقوقها اللي لازم تاخدها.
وبالفعل المحامي بدأ الإجراءات، واتفق معاهم إنهم مايدخلوش في أي نقاش مع سامح، ولا يبلغوه بحاجة، ويسيبوا الإعلانات والإجراءات القانونية تمشي في طريقها الطبيعي. وفي الفترة دي، أمي كانت بتتعامل معايا بشكل مختلف تمامًا، مابقاش فيه اتصالات ولا سؤال عليه، وحتى لما كنت بعدى عليها كانت بتختصر كلامها معايا، ومابقاش ليه نفس المكانة اللي كان واخدها قبل كده.
كنت فاكر إنهم بيحاولوا يضغطوا عليه عشان ارجع اهتم بليلى، وإن الموضوع كله مجرد زعل وهيعدي. لحد ما في يوم كان قاعد مع شمس، والباب خبط فتحت الباب ومضيت استلام الورثه وفتحتهت، وفضلتواقرا الورقة مرة واتنين.
كانت ليلى رافعة عليه دعوى طلاق، وبتطالب بحقوقها الشرعية والنفقة الخاصة بابنها، مع طلب إثبات حضانتها له. قمت من مكانر بعصبية وقولتو: ـ إيه ده؟! هي ليلى رفعت عليا قضية؟!شمس بصتله باستغراب: ـ قضية إيه؟ـ مراتي رفعت عليا قضية طلاق!
دي شكلها اتجننت!شمس حاولت تخفي ابتسامتها وقالت: ـ ما أنا قلتلك من الأول إنهم بيحاولوا يوقعوك في مشاكل، واضح إن أمك وأختك هما اللي محرضينها. مسكت الورقة من إيدى وبدأت تقراها، وبعدها قالت: ـ طيب وإنت هتعمل إيه؟
رد بعصبية: ـ هعمل إيه يعني؟ مش هطلق، ومش هديها اللي هي عايزاه، هي فاكرة نفسها هتضغط عليا بالقضايا عشان أرجع لها؟!شمس قربت منه وقالت: ـ بالظبط، ماتتنازلش، خليها تعرف إن مش كل حاجة تتاخد بالعافية.
وقتها أخدت موبايلي واتصلت بأمي، وأول ما ردت قلتلها بعصبية: ـ إنتِ عارفة ليلى عملت إيه؟!ردت بهدوء: ـ عملت إيه؟ـ رفعت عليا قضية طلاق! إنتِ وأختي اللي وراها، صح؟ـ ليلى ست كبيرة وعاقلة، وهي اللي اختارت تاخد حقها، وإحنا مش بنعمل غير إننا بنساعدها.
ـ يعني إنتِ موافقة على اللي بيحصل ده؟ دي مراتي وأم ابني!أمي ردت بصوت ثابت: ـ أيوه يا سامح، هي مراتك وأم ابنك، ودي بالذات الأسباب اللي كان المفروض تخليك تصونها وتحافظ عليها، مش تسيبها مريضة وتمنع عنها حتى السؤال.
ـ أنا مش هطلق يا ماما، خليها تعرف إن الموضوع مش بالساهل. ـ محدش طلب منك تطلقها غصب عنك، القانون له إجراءاته، وهي هتاخد حقها بالطريقة اللي شايفاها مناسبة. قفلت معاها وأنا في قمة غضبي، واتصلت بأختي، لكنها رفضت تدخل معايا في أي نقاش وقالتلي إن كل الكلام بقى مع المحامي.
مرت الشهور، وكنت رافض الطلاق، وكل ما المحامي يطلب منى تسوية أو حل ودي كنت ارفض، لكن ليلى وأهلى ماوقفوش الإجراءات، وأختي كانت بتتابع كل جلسة وكل ورقة، وأمي كانت بتشجع ليلى إنها ماتخافش. وفي النهاية، وبعد استكمال الإجراءات القانونية، صدر الحكم بإنهاء العلاقة الزوجية، واتحددت الحقوق والنفقات المستحقة وفقًا لما قضت به المحكمة، وثبتت حضانة ليلى لابنها وفقًا للقانون.
ليلى أخيرًا قدرت تقفل صفحة كانت مليانة وجع، ورجعت لشقتها اللي كانت سايباها، وبدأت ترتبها من جديد، المرة دي مش باعتبارها بيت زوجها، لكن باعتبارها بيتها وبيت ابنها. أمي ساعدتها في ترتيب العفش، وأختي جابت لها حاجات جديدة للشقة، وفي أول ليلة ليها هناك، أمي قعدت جنبها وقالتلها:
ـ البيت بيتك يا بنتي، وإنتِ مش غريبة عننا، وابنك ابننا، ومش هنسيبكوا أبدًا. ليلى تها وعيطت، وقالت: ـ عمري ما هنسى وقفتكم جنبي، إنتوا عوضتوني عن أهل كتير. أما أنا، فأول ما عرفت إن ليلى رجعت الشقة، اتصدمت، خصوصًا لما عرفت إنها مش راجعة لوحدها، دي رجعت ومعاها حكم الحضانة، وبقت من حقها تقيم في مسكن الزوجية باعتباره مسكن حضانة.
اتصلت بيها فورًا، ولما ردت قلت بعصبية: ـ إنتِ إزاي تدخلي شقتي من غير ما ترجعيلي؟!ردت بهدوء: ـ شقتك إيه يا سامح؟ دي شقة ابني اللي أنا حاضنته، وأنا رجعت بيته بحكم القانون. ـ إنتِ بتتكلمي بجد؟
يعني أنا أطرد من بيتي عشان إنتِ عايزة ترجعي؟ـ أنا ماطردتكش يا سامح، إنت اللي اخترت تسيب البيت وتتجوز، وأنا دلوقتي بنفذ حقي وحق ابني، ولو عندك اعتراض اتكلم مع المحامي. قفلت المكالمة في وشي، وفضلت مش قادر أستوعب إن ليلى اللي كانت بتسكت على كل حاجة، بقت بتواجهني بالشكل ده.
رجعت لشمس وحكيتلها، فاتفاجئت وقالت: ـ يعني إيه هتعيش في شقتك وإنت مش هتعرف تدخلها؟ـ أيوه، وده اللي حصل. ردت بضيق: ـ طب وإحنا؟ هنفضل عايشين هنا في الشقة التانية؟ أنا مش هقبل إنك تبقى متجوز واحدة تانية ولسه هي مسيطرة على بيتك!
ساعتها بدأت أحس إن قراري اللي كنت فاكره هيريحني، ابتدى يدخلني في مشاكل ماكنتش عامل حسابها. اضطريت أدور على شقة إيجار، لأن شقة الزوجية بقت من حق ليلى وابني باعتبارها الحاضنة، وأنا بقيت مش قادر أتصرف فيها.
استأجرت شقة أصغر في منطقة تانية، وبدأت أحس لأول مرة بتقل المسؤولية اللي كنت زمان برميها كلها على ليلى. مرتبي اللي كنت بصرف جزء كبير منه على شمس، واللي كنت بدلعها بيه وأجيب لها كل اللي نفسها فيه، اتقسم فجأة.
جزء نفقة ليلى وابني، وجزء إيجار الشقة الجديدة، والباقي مصاريف أكل وشرب ومواصلات، وكنت بالعافية بعرف أكمّل الشهر. شمس في الأول حاولت تتأقلم، لكن مع الوقت بدأت تتغير، خصوصًا لما بقت تطلب حاجة وأقول لها مش معايا.
في يوم كنا قاعدين، فقالتلي: ـ سامح، أنا عايزة أغير الموبايل بتاعي. قلتلها: ـ استني الشهر الجاي يا شمس، أنا لسه دافع الإيجار والنفقة ومش معايا فلوس كفاية. بصتلي بضيق وقالت: ـ يعني إيه استني الشهر الجاي؟ هو أنا اتجوزتك عشان أفضل أستنى؟
ـ يا حبيبتي أنا مش برفض لك طلب، بس الظروف اتغيرت. ـ ظروف إيه؟ إنت كنت بتصرف على ليلى وابنك عادي، ودلوقتي بقيت بتصرف عليهم غصب عنك، وأنا اللي أدفع تمن جوازتك القديمة!اتعصبت من كلامها وقلت: ـ دي أم ابني، ودي نفقة واجبة عليا، مش بمزاجي.
