وفي الناحية التانية، حياة ليلى بدأت تتغير تمامًا، جوز أختي كان شايف إنها محتاجة تقف على رجليها وتبقى مستقلة ماديًا، فعرض عليها شغل في المكان اللي هو شغال فيه، وهي وافقت وبدأت تنزل الشغل كل يوم.
كانت بتسيب ابني الصبح مع أمي، وتروح شغلها وترجع تاخده، وأمي كانت مبسوطة إنها بقت تشوف حفيدها كل يوم، وليلى كمان بدأت تستعيد ثقتها في نفسها، وبقى ليها دخل خاص بيها، ومابقتش مستنية مني جنيه غير النفقة المقررة لابني.
أما أنا، فحياتي مع شمس كانت بتسوء يوم بعد يوم، المشاكل مابقتش بتخلص، وكل شوية تطلب الطلاق، ولما أسألها عن السبب تقول إنها مش قادرة تعيش في المستوى ده، وإنها اتجوزتني عشان أعيشها ملكة مش عشان تحسب كل جنيه.
وفي كل مرة كانت تطلب الطلاق، كنت أقول لها: ـ أطلقك إزاي دلوقتي؟ أنا مش معايا فلوس أديكي حقوقك. فترد بعصبية: ـ يعني أنا هفضل مربوطة بيك بالعافية؟!ومع الوقت بدأت أحس إن شمس مش شايفة فيا غير الفلوس اللي كنت بصرفها عليها، وإن كل الحب اللي كانت بتتكلم عنه اختفى أول ما الظروف اتغيرت.
حاولت أكلم ليلى أكتر من مرة، وفي مرة روحت لها وطلبت منها نتكلم بعيد عن أمي، لكنها رفضت. قلتلها: ـ يا ليلى، أنا عارف إني غلطت في حقك، بس صدقيني أنا اتغيرت، ومش عايز أفضل عايش بالشكل ده. ردت بهدوء: ـ وإنت عايز مني إيه يا سامح؟
ـ عايز نرجع لبعض، نبدأ من جديد، وننسى اللي فات. بصتلي وقالت: ـ إنت فاكر إن الموضوع بالسهولة دي؟ أنا يوم ما كنت محتاجاك وطلبت منك تيجي تنقذني من التعب، قفلت تليفونك وقعدت مع مراتك، ويوم ما أمك احتاجتك عملت نفسك مش شايفها، ويوم ما كنت محتاجة أحس إني ليا قيمة في بيتك، كنت بتذلني قدام شمس.
إنت ما خسرتنيش يوم ما اتطلقت، إنت خسرتني من أول يوم قررت فيه إن كرامتي مش مهمة عندك. حاولت أبرر: ـ كنت غلطان، بس أنا كنت فاكر إني بحبها. قالت: ـ وأنا مش هفضل أدفع تمن اختياراتك كل مرة تندم فيها، أنا دلوقتي عندي شغل وابني وأهلي اللي واقفين جنبي، ومش محتاجة أرجع لحياة كنت فيها آخر واحدة في حساباتك.
مشيت من عندها وأنا حاسس إني فقدت آخر فرصة، لكن ماكنتش عارف إن اللي جاي هيكون أصعب. عدت سنتين، وليلى حياتها استقرت، وابني كبر وبقى متعلق بيها وبأمي، وفي يوم عرفت إن فيه عريس اتقدم لها، راجل محترم ومن سنها، وعنده شغل وبيته، وليلى وافقت عليه بعد ما استخارت وفكرت كويس.
وقررت انها تفضل تروح لماما كل اسبوع تخدمها وقسمت الاسبوع بينها وبين اختى لما الخبر وصلني اتجننت، واتصلت بأمي أسألها: ـ هو الكلام اللي سمعته ده صح؟ ليلى هتتجوز؟!ردت بهدوء: ـ أيوه يا سامح، وربنا يوفقها ويعوضها خير. ـ وإنتِ موافقة على كده؟!ـ وأنا مالي يا ابني؟
دي ست مطلقة وليها حق تعيش حياتها، ولا إنت كنت متخيل إنها هتفضل مستنياك طول عمرها؟ماقدرتش أرد، وبعد فترة ليلى اتجوزت فعلًا، وانتقلت لبيت جوزها، وسابت شقة الزوجية، ورجعت الشقة ليا تاني باعتبار إن حق الإقامة فيها انتهى بانتقالها، ورجعت أنا وشمس نعيش فيها.
كنت متخيل إن رجوعي للشقة هيكون بداية جديدة، لكن الحقيقة إن حياتي ما رجعتش زي الأول، ولا البيت رجع زي ما كان. شمس فضلت زي ما هي، طلبات وخناقات واعتراضات، وأنا بقيت كل ما أبص حواليا أفتكر ليلى، وأفتكر أمي وهي بتعيط، وابني اللي كبر بعيد عني، والبيت اللي كان زمان مليان حياة.
والأغرب إن أمي ما رجعتش تعتمد عليا زي زمان، ولا ليلى رجعت تطلب مني أي حاجة، وحتى ابني لما بييجي يشوفني بيبقى مستني يرجع لأمه وجدته. ساعتها فهمت إن ليلى ماكانتش محتاجة راجل يصرف عليها قد ما كانت محتاجة راجل يحترمها ويصونها، وإن شمس اللي اخترتها عشان قلبي دقلها، ماقدرتش تحبني لما جيت عليها الأيام.
أنا اللي فرطت في بيت كان فيه كل أسباب السعادة، وفضلت أدور على السعادة في مكان تاني، ولما اكتشفت قيمتها كان غيري بقى هو اللي بيعيشها مع الست اللي أنا ضيعتها. النهاية.
