
أنا اللي دفعتها لكده يا طارق! أنا اللي دوست على الجرح اللي كان ميت في قلبها!
أمي بصتلي وعينيها مليانة ندم حقيقي، وقالت:
إمبارح، سلمى كانت جاية مبسوطة وجايبالي هدية، وبتتكلم معايا عادي.. بس شيطاني عماني، والغيرة عمتني لما لقيتها بتقول إنك ناسي كل همومك معاها ومبسوطين.. حسيت إنها خدتك مني.. ففضلت أسمعها كلام يسم البدن، قعدت أعيرها بمرض أبوها اللي توفى بيه ومكنش حيلتهم حق الدوا، وعيرتها بفقر عيلتها.. ولما قالتلي حرام عليكي يا طما أنا شايلاكي فوق راسي، الشيطان وسوسلي أكتر، وقلتلها اللي سمعته بنفسك إنتي جاية من الشارع، ولولا ابني كان زمانك مرمية هناك!.. سلمى وقتها عقلها طار، شافت أهلها بيتهانوا بعد كل التضحية اللي عملتها، والشبشب اللي رمته ده مكنش فيا.. ده كان غضب سنين من القهر والذل اللي شربته مني ومنكم وهي كتماه في قلبها ومستحملة عشان بس بتحب يوسف ومش عايزة تفرق بينه وبين أهله!
الأوضة بقت شبه المقبرة.. صمت رهيب ومخيف، مفيش غير صوت شهقات سلمى اللي خلاص مكنتش قادرة تكتمها، قعدت على الشنطة في الأرض وحطت وشها بين إيديها وانهارت بالبكاء.. صوت بكاها كان بيقطع في لحمي حتة حتة.
أنا وقفت مكاني مش قادر اتحرك.
افتكرت كل مرة كنت برجع فيها وألاقيها عينيها حمرا، ولما أسألها تقولي مفيش، البصل حرق عيني، أو شوية صداع بس يا حبيبي..
افتكرت لما كانت بتيجي تقعد جنبي وتتنهد تنهيدة طالعة من قاع روحها، وأنا أقولها مالك يا سلمى؟ تقولي نفسي نعيش في مكان لوحدنا يا يوسف، وكنت بتعصب عليها وأقولها عايزة تفرقيني عن أهلي وعن أمي؟! إنتي ست أنانية!.
كل المشاهد دي مرت قدام عيني زي شريط سينما، وكل مشهد كان بيغرز وجع في قلبي. أنا اللي كنت أعمى.. أنا اللي كنت فاكر إني راجل وبحافظ على أهلي، وطلعت سايب أكتر إنسانة حبتني تتداس تحت رجليهم وأنا شريك في الظلم ده بسكوتي وغبائي.
قربت من سلمى ببطء، ونزلت على ركبي قدامها في الأرض.. مكنتش خايف من نظرة طارق، ولا نظرة نهى، ولا حد في الدنيا.. مسكت إيديها اللي كانت بتترعش، حاولت تسحبهم مني، بس مسكتهم بقوة، ورفعت وشها ليا.
عيونها كانت متورمة، وملامحها اللي بحبها كانت دبلانة ومكسورة بسببي وبسبب عيلتي.
سلمى.. صوتي طلع مبحوح ومكسور: ليه؟! ليه مقولتليش؟! ليه شيلتي كل ده لوحدك وخليتيني أبان قدام نفسي وقدامك بالندالة دي؟!
سلمى بصتلي بكسرة وقالت بصوت متقطع:
كنت هقولك إيه يا يوسف؟ كنت هقولك أخوك الكبير خد حقي وبيهددني؟! كنت هقولك أختك بتعاملني كأني جارية وبتمد إيدها عليا؟! كنت هقولك أمك اللي إنت بتعبد ترابها بتعيرني بفقر أهلي وتوفى أبويا؟! لو كنت قلتلك، كنت هحطك في نفس الموقف ده.. كنت هخليك تختار بيني وبينهم، وأنا عارفة إنك كنت هتختارهم وتدبحني عشان تريح ضميرك وتقول أهلي! استحملت وقولت بكرة يحسوا، بكرة يعرفوا إني بنت ناس ومتربية وإني شايلاهم عشانك.. بس أنتوا معتبرتوش ده أصل.. أنتوا اعتبرتوه ضعف وقلة حيلة!
كلامها كان كلماتها ثقيلة بتنزل على دماغي، مفضلش عندي أي مبرر أقوله، مكنش عندي غير ندم بيحرق كياني.
طارق من ورايا، كأنه حس إن الأرض بتتسحب من تحت رجليه وسلطته على البيت بتنتهي، اتكلم بصوت فحيح ومليان غل:
ما هو ده اللي إنتي عايزاه يا ست سلمى، صح؟! عايزة تقلبي البيت حريقة وتفرقي الإخوات عن بعض وتطلعي إنتي الملايكة وإحنا الشياطين! ماشي يا يوسف.. وطّي وبوس رجلين مراتك، بس اعمل حسابك، الباب اللي تخرج منه الست دي مش هيكون ليك فيه مكان بينا.. اختار دلوقتي، يا تخرج معاها وتنسى إنك ليك عيلة، يا تقف مع إخواتك وتنهي المهزلة دي وتطلّقها رسمي!
لفيت لطارق.. ووقفت على طولي.
الراجل اللي كان جوايا زمان، اللي كان بيخاف على زعل إخواته وبيدوس على نفسه وعلي بيته عشان يرضيهم، اختفى في اللحظة دي.. بصيتله في عينه بجمود مكنش متعود عليه مني، وقولتله بصوت هادي ومرعب من كتر الهدوء:
اخرج برة بيتي يا طارق.
طارق عينيه وسعت بصدمة:
إنت بتقول إيه؟! بتطردني عشان دي؟!
اخرج برة بيتي، إنت وأختك.. دلوقتي، ومش عايز أشوف وشكم هنا تاني لحد ما أعرف إزاي أرجع الحق وأوقف كل إهانة وجهتوها لمراتي في غيابي!
نهى شهقت وحطت إيدها على صدرها:
بتطردنا يا يوسف؟! بتبيع إخواتك؟!


