مش عشان كلامها عن الأكل، لكن عشان الطريقة اللي بتكلمني بيها، وكأنها صاحبة حق عندي وأنا اللي لازم أثبت لها براءتي!
قلت لها وأنا بحاول أتمالك أعصابي: “أوعي كده وعديني أطلع حاجتي.”
مدت إيدها على الشنطة، وهنا أنا ما قدرتش أستحمل.
زقيت إيدها بعيد وقلت لها: “إوعي تمدي إيدك على حاجتي تاني! إنتِ مالكيش إنك تفتشي اللي داخل بيتي، ولا تسأليني أنا كنت فين وجاية منين!”
وشها اتغير، وبصت لي بصدمة، وكأنها أول مرة تسمع مني كلمة مش على مزاجها.
قالت: “إنتِ بتزقيني أنا؟! إنتِ نسيتي نفسك ولا إيه؟”
قلت لها: “أنا ما زقيتكيش عشان أذلك، أنا بعدت إيدك عن حاجتي، وده حقي. إنتِ مش من حقك تفتشي ورايا ولا تتحكمي فيا.”
صرخت في وشي: “إنتِ مش عارفة إن حماتك لما مش بتكون هنا أنا مكانها؟!”
ضحكت من كتر القهر وقلت لها: “حماتي حاجة وإنتِ حاجة تانية خالص. أنا بحترم حماتي عشان هي أم جوزي، إنما إنتِ سلفتي، زي ما أنا سلفتك، لا إنتِ مسؤولة عني ولا أنا مسؤولة عنك. وجوزي هو اللي يعرف أنا رايحة فين وجاية منين، مش إنتِ!”
قالت لي: “والله لأربيكي من أول وجديد! إنتِ فاكرة نفسك مين؟”
قلت لها: “أنا مش محتاجة حد يربيني، أنا ست متجوزة وعندي بيتي وعيالي، ومش هقبل إن حد يهيني أو يفتش حاجتي.”
شلت الأكياس مع عيالي وطلعت شقتي، وقفلت الباب.
كنت فاكرة إن الموضوع انتهى عند كده، وإن كل واحدة هتلزم حدودها.
لكن أنا ما كنتش أعرف إن اللي مستنيني بعد رجوع حماتي هيكون أصعب من الخناقة نفسها!
بعد حوالي ساعتين، سمعت خبط عنيف على باب شقتي.
فتحت، لقيت حماتي واقفة، ووشها أحمر من الغضب، وسلفتي وراها بتعيط وبتحكي رواية مختلفة تمامًا عن اللي حصل.
حماتي أول ما شافتني صرخت: “إنتِ واحدة ما أهلك ما عرفوش يربوكي؟! إنتِ ما بتفهميش في الأصول؟! إزاي تمدي إيدك على سلفتك الكبيرة وتكلميها بالطريقة دي؟!”
قلت لها بهدوء: “يا حماتي، حضرتك اسمعيني بس، أنا كنت عند أمي، ولما رجعت سلفتي وقفتني ومنعتني أطلع حاجتي، ومدت إيدها على الشنطة عشان تفتشها، وأنا بعدت إيدها عن حاجتي.”
ردت عليا بعصبية: “حتى لو حصل، ده مش مبرر تكلميها كده! دي مرات ابننا الكبير، وليها احترامها!”
قلت لها: “وأنا كمان ليا احترام يا حماتي. هو الاحترام بقى لواحدة دون التانية؟”
قالت: “إنتِ بتجادليني أنا كمان؟! بدل ما تعتذري لها، قاعدة تحاسبيني على كلامي؟”
ساعتها حسيت إن مفيش فايدة من الكلام.
قلت لها: “خلاص يا حماتي، من هنا ورايح أنا هقفل باب شقتي على نفسي، ومليش دعوة بحد. محدش له يسألني أنا رايحة فين ولا جاية منين، ولا يفتش حاجتي، ولا يتدخل في تربيتي لعيالي. واللي عايز يعرف حاجة تخصني، يتكلم مع جوزي.”
حماتي اتجننت من كلامي، وفضلت تقول إني قليلة الأصل، وإن أمي هي اللي علمتني قلة الاحترام.
وهنا سلفتي دخلت على الخط وقالت: “والله يا ماما، أنا من أول يوم وأنا حاسة إنها شايفة نفسها علينا، بس كنت بسكت عشان خاطرك. إنما دي لو اتسابت كده، بكرة هتطردنا من البيت!”
بصيت لها وقلت: “أطردكم من بيت إيه؟! هو أنا طلبت من حد يمشي؟ إنتِ اللي عايزة تتحكمي فيا!”
الموضوع كبر، والكلام وصل لأبويا وجوزي.
أبويا أول ما عرف اللي حصل، جه بنفسه، وطلب يقعد مع حماتي وسلفتي عشان يفهم الحكاية.
سمع كلامهم، وبعدها بص لي وقال: “احكي يا بنتي اللي حصل من أوله.”
حكيت له كل حاجة بالتفصيل.
أبويا بص لسلفتي وقال لها: “يا بنتي، إنتِ زيها بالظبط. إنتِ مش أمها ولا أختها الكبيرة عشان تحاسبيها على خروجها ودخولها. دي ست متجوزة وليها بيت وجوز مسؤول عنها، ولو عندك اعتراض على حاجة، تتكلمي باحترام.”
سلفتي ردت عليه بمنتهى الجرأة: “إيه يا حاج، ما إنت أبوها وبتتكلم كده! أمال هي هتتكلم إزاي؟ ما هي بتتكلم من اللي اتعلمته منك في الأصول فعلًا! هتجيب الأصول دي منين؟!”
البيت كله سكت.
أنا بصيت لأبويا، لقيت وشه اتغير، لكنه ما مدش إيده ولا علا صوته.
قال لها: “أنا جيت أتكلم معاكي باحترام، لكن واضح إنك مش عارفة يعني إيه احترام الكبير فعلًا. الكبير مش بالسن ولا بإن جوزك أكبر من جوزها، الكبير بأخلاقه.”
حماتي صرخت: “إحنا مش هنقبل إن حد يغلط في مرات ابني الكبير! يا تعتذر لها، يا إما مفيش ليكي مكان وسطنا!”
ساعتها أبويا وقف وقال: “بنتي مش هتعتذر عن حقها، لكن لو غلطت في حد، أنا أول واحد هخليها تعتذر. إنما محدش هيجبرها تعتذر عشان ترضي غرور حد.”
وقبل ما نمشي، حماتي قالت آخر كلمة وجعتني: “خلاص، خليها عندك بقى، ولما جوزها يطلقها ابقى صرف عليها!”
رجعت بيت أبويا وأنا حاسة إن الدنيا كلها اتقفلت في وشي.
مش قادرة أصدق إن خلاف على شنطة فيها أكل جايباه أمي لعيالي، يوصلني إني أسيب بيتي!
جوزي اتصل بيا بالليل، وكان واضح إنه متضايق جدًا.
قال لي: “إنتِ إزاي تكبري الموضوع بالشكل ده؟! ما كنتِ اعتذرتي لها وخلاص، وكنا خلصنا!”
قلت له وأنا بعيط: “أعتذر عن إيه يا أحمد؟ عن إني منعتها تفتش حاجتي؟ عن إني رفضت إنها تتحكم فيا؟ ولا عن إنها غلطت في أبويا؟!”
قال: “أنا مش بقول إن هي صح، بس إنتِ عارفة أمي، لو الموضوع فضل كده مش هتسكت.”
قلت له: “يعني الحل إني أنا اللي أتكسر عشان أمك ترتاح؟!”
سكت شوية، وبعدها قال: “بصي، أنا عايزك ترجعي بيتك، بس اعتذري لها قدام الناس اللي كانوا موجودين، ونقفل الصفحة دي.”
قلت له: “ولو ما اعتذرتش؟”
