اتجمدت مكاني. مين هو اللي بيشوفها؟ ومين اللي بيزعقلها؟رفعت عيني ناحية آسر، لقيته مركز معايا ووشه اتغير لما لاحظ الخوف اللي ظهر على ملامح بنته. سألني بقلق: “هي قالتلك إيه؟”
اترددت لحظة، وبعدين قلت: “ممكن أتكلم مع حضرتك على انفراد؟”
داليا ضحكت وقالت: “هو إحنا لسه هنبدأ أسرار؟
البنت دي مش ناقصة أوهام.”
لكن آسر رفع إيده وأسكتها. وقال بحزم: “داليا، اطلعي أوضتك دلوقتي.”
بصتله بصدمة: “آسر! إنت بتطردني من بيتي؟”
رد ببرود: “قلتلك اطلعي.”
خرجت وهي بتبصلي بنظرات مليانة غضب ووعيد. آسر قرب مني وسألني: “قوليلي بنتي قالتلك إيه؟
”
بصيت لمريم الأول، وبعدها قلتله: “أنا مش عايزة أخوف حضرتك، لكن بنتك بتفهم لغة الإشارة كويس، وعندها كلام كتير نفسها تقوله، بس واضح إنها خايفة.”
آسر حط إيده على راسه وقال: “إزاي؟ أنا جبتلها أكبر دكاترة التخاطب في مصر، محدش فيهم قال إنها بتعرف لغة الإشارة!
”
قلتله: “يمكن محدش حاول يسمعها بالطريقة اللي هي محتاجاها.”
الجملة دي خلته يسكت. قعد على ركبته قدام بنته، ورفع إيده بتردد، لكنه ما كانش عارف يعمل أي إشارة. مريم بصتله، وبعدها نزلت عينيها للأرض. مديت إيدي ناحيتها وسألتها: “ممكن تقولي لبابا إنك بتحبيه؟
”
بصت لأبوها، ورفعت إيديها ببطء، وعملت الإشارة. آسر عينيه اتمَلوا دموع، ومد إيده يمسك إيد بنته ويقبلها. لكن فجأة مريم اتراجعت بخوف، وحــ,,ـــــضنت الأرنب بتاعها بقوة. وبصتلي بسرعة، وبدأت تحرك إيديها بعصبية. قالتلي:
“مش بابا… الراجل التاني… هو اللي بييجي بالليل… هو اللي خلاني أسكت.”
حسيت إن الأرض بتتهز من تحتي. بصيت لآسر، كان لسه بيبص لبنته بحب، ومش سامع ولا فاهم اللي هي بتحاول تقوله. سألني: “هي قالت إيه؟”
بلعت ريقي، وبصيت ناحية باب القصر المقفول. لأن فجأة سمعت صوت خطوات تقيلة جاية من الدور اللي فوق. وبعدها صوت راجل بيقول:
“يا أستاذ آسر، أنا رجعت من المستشفى… والدكتورة عايزة حضرتك ضروري.”
كان ده صوت الدكتور المسؤول عن حالة مريم. لكن أول ما مريم سمعت صوته، صرخت من غير صوت، وستخبت ورا ضهري وهي بتترعش. وفي اللحظة دي فهمت إن الراجل اللي هي خايفة منه ممكن يكون أقرب شخص المفروض يحميها!
والأخطر من كده، إن كاميرا المراقبة اللي فوق السلم كانت لسه بتسجل كل اللي حصل بيني وبين البنت الصغيرة.#حكايات_شروق_خالد#حصري
