جزء الثالث والاخير
دخلنا قسم الشرطة، وصوت خطواتنا كان بيرن في الممر الطويل المدهون أصفر كئيب، الممر اللي بيفصل بين الحقيقة والكدب، بين القوة المزيفة والضعف اللي بيقلب لجبروت. ريحة الدخان والشاي المغلي والكلابشات كانت مالية الجو، وأنا ماشية ضهري مفرود ورا طارق، حاسة لأول مرة من سنين إني مش نادية الطيبة المغفلة، أنا نادية اللي جاية تاخد حقها تالت ومتلت.
كريم كان ماشي قدامنا ورا عسكري الحراسة، كتفه مايل وعينه في الأرض، كأنه عيل ممسوك بيسرق من كانتين المدرسة. أما ياسمين، فكانت ماشية بتعريج خفيف وبتحط إيدها على بطنها كل خطوتين، بتبص لأي حد يجي عينه في عينها بنظرة الضحېة
المظلومة، بس لمعة الغل في عينيها كانت ڤضحاها.
وصلنا قدام مكتب رئيس المباحث، يافطة نحاس محفورة المقدم حسام عبد الدايم رئيس وحدة المباحث.
العسكري خبط ودخلنا. المكتب كان واسع، ورا المكتب كان قاعد ضابط تلاتيني، ملامحه حادة وعينيه فاحصة وباردة زي المشرط. كان ماسك محضر قديم في إيده وبيشرب قهوة، أول ما دخلنا رفع عينه، وبص للمجموعة الغريبة اللي قدامه ست ملامحها هادية بس عينيها حجر أنا، محامي لابس شيك جدا وماسك شنطة جلد طارق، راجل متبهدل ووشه أصفر من الړعب كريم، وواحدة حامل في شهورها الأخيرة لابسة فستان سواريه ومتزوقة كأنها جاية من فرح.
الضابط حسام رمى القلم على المكتب وسأل بصوت
رخيم خير يا حضرة الظابط؟ إيه الليلة دي كلها؟
ضابط النجدة حط كشف البلاغ على المكتب وأدى التحية تمام يا فندم، بلاغ استغاثة باقټحام مسكن وبلطجة في التجمع، المهندسة نادية مقدمة البلاغ، والأستاذ كريم جوزها والمدام دي مراته التانية، وكان معاهم اتنين محامين اتحفظنا عليهم في النوبتجية برة عشان مش معاهم كارنيهات سارية وعليهم شبهة انتحال صفة.
المقدم حسام بص لكريم إنت كريم المنشاوي؟
كريم بلع ريقه وصوته طلع مبحوح أيوة يا فندم… والله الموضوع كله سوء تفاهم عائلي. دي مراتي ودي مراتي، وحصل خلاف على الشقة، وأنا راجل مهندس ومحترم وعمري ما دخلت قسم شرطة، دي نزغة شيطان وخلافات حريم و…
طارق
قاطعه
خبطة واثقة على طرف المكتب وهو بيطلع كارنيه النقابة والتوكيل اسمحلي يا سيادة المقدم. الموضوع أبعد ما يكون عن خلاف حريم أو نزغة شيطان. إحنا قدام جناية تزوير في محررات رسمية، وخېانة أمانة، وسړقة مسكن، واستيلاء على مبالغ تتجاوز الستة مليون جنيه بطرق احتيالية.
ياسمين شهقت بصوت عالي ودموع التماسيح نزلت شلال على خدها ستة مليون إيه يا باشا؟! ده محامي كداب ومرتشي، والست دي أصلا طليقة جوزي وبتتبلى علينا عشان حرقانة مني ومن ابني اللي في بطني! الست دي عاقر بقالها ١٥ سنة مش بتخلف وعايزة تدمرنا وتخرب بيتنا!
الكلمة طلعت من بقها زي السم، رنت في الأوضة وخلت العسكري اللي واقف
على الباب يبصلها باستهجان. حسيت بوغزة خفيفة في قلبي، بس الغريب إن الۏجع مشلنيش زي زمان. بصيت لها وابتسمت، ابتسامة باردة جدا خلت ياسمين تسكت فجأة وترتبك.
المقدم حسام خبط بإيده على المكتب خبطة رجت الكوبايات بس! كلمة زيادة هنا والكلابشات هتنزل في إيدك إنتي وهو قبل الصبح! إحنا في مكتب حكومة مش في سوق خضار! اقعدوا كلكم.
قعدنا على الكراسي الجلد اللي قدام المكتب. المقدم حسام بص لطارق هات اللي عندك يا أستاذ طارق، بس بالورق والإثبات مش بالخطب.
طارق فتح الشنطة، وطلع دوسيهين واحد كان معاه، والتاني هو الظرف البني اللي أنا لقيته في الخزنة.
سيادتك، موكلتي المهندسة نادية اتفاجأت
النهارده بالصدفة البحتة إن جوزها متجوز عليها من أكتر من سنة. ده حقه الشرعي حتى لو فيه نذالة، لكن اللي مش حقه هو الآتي أولا، الشقة موضوع البلاغ مملوكة بالكامل لموكلتي بعقد بيع مسجل وخالصة الثمن من مالها الخاص وميراثها الشرعي، وادي صورة العقد المشهر المؤرخ من تسع سنين. ثانيا، تم استغلال توكيل عام قضايا وإدارة كانت موكلتي عملته للأستاذ كريم من سنتين، وعمل بيه تلاعب وشراء ورهن عقاري لحساب شركة مقاولات اسمها نيو فيجن.
المقدم حسام حواجبه اترفعوا وبص في الورقة شركة إيه؟
نيو فيجن للمقاولات والتجارة يا فندم. متأسسة من تمن شهور، الشركاء فيها ياسمين مصطفى عبد العزيز بنسبة
