فضلت باصة له شوية، وبعدين قلت: ـ مربيها؟ هي بنتك يا ممدوح ولا أختك؟ أنا فاهمة إنك اتربيت معاها وإنك بتعتبرها أختك، لكن ده مش معناه إنك تتعامل معاها بالشكل ده!
رد بعصبية: ـ بالشكل ده إزاي؟ هو أنا عملت إيه غلط؟ شيلتها عشان رجليها وجعاها، ولا كنتِ عايزاني أسيبها تقع قدامك؟
ـ وإنت لما كنت بتتعب كنت بتقولي إني بدلعك، ولما كنت بطلب منك تنزل معايا تشتريلي حاجة كنت بتتحجج بالشغل والتعب، لكن نانسي فجأة بقت محتاجة حد يشيلها ويدلعها ويشتريلها؟
ضحك بسخرية وقال: ـ إنتِ هتفضلي تحاسبي على كل جنيه وكل تصرف؟ أنا بصرف من فلوسي، وبعمل اللي أنا شايفه صح، ومش محتاج آخد إذن من حد عشان أكرم أهل بيتي.
الكلمة استفزتني، فسألته: ـ أهل بيتك؟ تقصد مين بأهل بيتك يا ممدوح؟
رد ببرود: ـ أقصد شريفه وبناتها، الناس اللي اتربيت وسطهم، واللي ليهم فضل عليّا.
ـ فضل إيه اللي بتتكلم عنه؟ مش إنت بنفسك حكيتلي إن مرات أبوك طردتك بعد غياب أبوك وأخدت نصيبها من البيت؟ مش إنت اللي كنت بتشتغل وتنام في أي مكان لحد ما بابا وقف جنبك؟
اتغيرت ملامحه وقال بحدة: ـ إوعي تدخلي في حكايات إنتِ ما عشتيهاش، أنا عارف أنا بعمل إيه كويس.
سكت لحظة، وبعدين كمل: ـ وبعدين خليكي فاكرة إن جوازنا عمره ما كان سبب إني أنسى الناس اللي وقفت جنبي.
بصيتله بوجع وقلت: ـ تقصد إيه؟ تقصد إنك اتجوزتني عشان ترد جميل بابا؟
ما ردش، ولف وشه بعيد عني، لكن سكوته كان أقسى من أي إجابة. وقبل ما أقدر أتكلم، سمعت صوت نانسي من فوق بتناديه:ـ ممدوح… ممكن تيجي؟ عايزاك في حاجة!
لقيته اتحرك ناحية السلم من غير حتى ما يبصلي، فقلت بصوت مخنوق:ـ استنى يا ممدوح، أنا لسه بتكلم معاك.
رد وهو طالع: ـ بعدين يا سميرة، نانسي محتاجاني دلوقتي.
وسابني واقفة لوحدي في الصالة، ولأول مرة أحس إن فيه ست تانية بقت لها الأولوية في بيتي، وإن جوزي مش شايف إن في ده أي مشكلة!
