ونص الدولاب، اللي كان مليان هدوم جابها لي، لسه زي ما هو.
كل حاجة دفع فيها فلوسه فضلت في مكانها
ألماس، وشنط ماركات، وفساتين غالية، وساعات، وبرفانات…
حتى الإسبراتيه اللي كلفته ثروة في مزاد دولي.
ما نقصتش ولا قطعة غالية واحدة.
يوسف كشر حواجبه ودخل الأوضة.
فتح أول درج… فاضي.
التاني… فاضي
الحاجة الوحيدة اللي اختفت كانت الحاجات البسيطة جدًا اللي تخصني أنا فعلًا، واللي كانت عندي من قبل ما أعرفه
فرشة شعري القديمة.
كتابين قدام.
علبة صور قديمة.
الشاحن بتاعي.
وبلوفر صوف قديم ورخيص كنت اشتريته وأنا لسه طالبة.
وبس… ده كل اللي أخدته معايا.
قدرت ألخص سنين عمري اللي ضاعت في شنطة سفر واحدة!
يوسف وقف قدام الدولاب، وكان في حاجة في المنظر ده مستفزاه ومعصباه.
مش عارف إيه هي بالضبط.
..
يمكن كان متوقع إني آخد ماسة، أو شنطة غالية، أو أي حاجة تخليه يقدر يقول لنفسه بكل راحة بال
أهي طلعت مهتمة بالفلوس، وفي الآخر كل اللي كان يهمها الفلوس والدنيا!
لكن ما لقاش غير حاجته هو، وحاجاتي القديمة البسيطة اللي سبتها له.
في اليوم الرابع، اتصل بيا.
رقمي القديم ما بقاش موجود أصلًا، والخط اتقفل.
كشر وجرّب يتصل تاني.
مفيش رد.
فتح الشات، واكتشف إن رقمه معمول له بلوك.
لأول مرة حس بعصبية حقيقية ما كانش متعود عليها.
بعت لي رسالة من رقم تاني
بلاش عناد وتصلب، وبلاش عقل العيال ده.
ما جاوبتش.
بعت رسالة تانية
حاجتك لسه في مكانها، ما اترمتش.
وبرضه ما رديتش.
فضل قاعد مستني… ساعة، واتنين، من غير أي حس أو خبر.
اتصل بمسؤولة القصر والخدم وسألها
هي نور جت؟
لأ يا فندم.
اتصلت؟
لأ.
طلبتني في أي حاجة؟ أو بعتت حد ياخد شنط تانية؟
أبدًا يا سيادة اللواء، مفيش.
قفل السكة في وشها بعصبية.
فريدة ظهرت وراه فجأة وسألته
بتدور عليها؟
لأ.
أمال بتعمل إيه في دولابها؟
في حاجات تخصها لسه هنا.
فريدة بصت للدولاب باستخفاف وقالت
مش باين إن فيه حاجة تخصها… دي كلها هدوم ست تانية.
الكلمة دي نغزته في
ودنه، فلف لها بسرعة وقال
قصدك إيه؟
إنت اللي دافع تمنها يا حبيبي.
مش فارقة مين دفع.
بس دي الحقيقة.
يوسف قفل درج الدولاب بعنف وقال
سيبي الموضوع ده في حاله وانزلي.
أما أنا، فكنت نايمة في أوضة قديمة مستأجرة فوق مخبز عيش في حي شعبي هادي.
الشقة ما كانش فيها غير سرير خشب بيصرصر، وترابيزة صغيرة، ودولاب مكسور، وحمام المية السخنة فيه بتنزل بعد طلوع الروح.
أول ليلة ما غمضتش عيني أصلًا.
مش عشان كنت زعلانة على القصر أو الرفاهية…
لكن لأن السكوت هناك كان ليه طعم مختلف.
مفيش صوت خطوات الخدم، ولا أبواب خشب عملاقة بتتفتح وتتقفل، ولا عربيات فارهة داخلة وطالعة، ولا جزء من دماغي مشغول طول الوقت بمتابعة يوسف جه ولا لسه؟ اتأخر برة ولا رجع؟
الساعة كانت ستة الصبح لما سمعت صوت صواني الفرن وهي بتخبط تحت، وريحة العيش الطازة طلعت على السلم مع بخار الشاي.
فتحت عيني وبصيت للسقف، وقلت لنفسي بهدوء
أنا لوحدي.
الفكرة كانت مرعبة… وفي نفس الوقت مريحة جدًا.
كان معايا شوية مدخرات بسيطة، مش كتير.
يوسف كان بيبعت لي مصروف شهري، وأنا بطبيعتي عمري ما كنت مبذرة ولا بحب التباهي، حتى وأنا عايشة في
عز ونعيم.
كنت باحتفظ بجزء من الفلوس على جنب.
المبلغ ما كانش هيكفيني طول عمري،
لكنه كان كفاية إني أبدأ من جديد وعلى نضافة.
أول خطوة عملتها إني اشتريت خط تليفون جديد برقم محدش يعرفه.
تاني خطوة كانت إني أدور على شغل.
وهنا كانت الصدمة اللي كسرتني في البداية.
كان عندي سبعة وعشرين سنة، قضيت منهم ست سنين كاملة محبوسة جوه دور الست اللي قاعدة عشان تريح راجل.
ما عنديش شهادة قوية، ولا خبرة عمل حقيقية، ولا حتى معارف تخصني أنا لوحدي.
في أول مقابلة عمل رحتها، سألوني السؤال اللي وجعني
إنتِ عملتي إيه في الخمس سنين اللي فاتوا من عمرك؟
سكت تمامًا.
أقول لهم إيه؟!
أقول لهم إني كنت باختار الفساتين اللي تليق على السهرات اللي بيحضرها يوسف؟
أقول لهم إني اتعلمت أختار أنواع العصير الغالي، وأعرف الراجل ده متعصب ليه من صوت مفاتيحه وهي بتخبط على الترابيزة
