
نادين دي مكنتش مجرد بنت عم، دي كانت الحب القديم بتاع المراهقة قبل ما تسافر كندا، وكانت دايماً بتتدلع عليه، ونرمين لو عرفت بالقصة دي، الغردقة كلها هتولع!
طارق اتكلم بصوت واطي ومكتوم: “بابا.. نادين مين اللي تيجي هنا؟ الفيلا ضيقة وبعدين نرمين معايا، وأنت عارف نرمين وغيرتها.. الموضوع مش هيعدي على خير.”
الشاذلي بيه رد بحدة: “جرى إيه يا طارق؟ دي بنت عمك ولحمك، والفيلا تساع من الحبايب ألف. أنا قولت للبت خلاص وهي جاية بكرة، استقبلوها كويس.. سلام.”
الخط قفل، وطارق فضل واقف مكانه والتليفون في إيده، وشه أصفر وعرقان من الارتباك، مش عارف يروح لنرمين يقولها إزاي إن في قنبلة موقوتة اسمها نادين هتوصل الفيلا بكرة الصبح وتشاركم أوضتهم ودنيتهم.
نرمين قربت منه، حطت إيدها على كتفه العريان وبصت في عينيه بشك: “مالك يا طارق؟ وِشك قِلِب ليه كدا بعد مكالمة حمايا؟ في حاجة حصلت في الشغل؟”
طارق حاول يبتسم ابتسامة صفرا وفرك إيديه في بعض: “لأ.. لأ يا حبيبتي، مفيش حاجة في الشغل خالص.. هو.. هو بس بابا كان بيكلمني في موضوع كدا.. عائلي شوية.”
نرمين ضيقت عينيها، وربعت إيديها وبصتله بنظرة فاحصة: “موضوع عائلي إيه اللي يخليك تترعش وتجيب ألوان كدا؟ اخلص يا طارق وقولي.. في إيه؟” ………….
طارق بَلع ريقه وصوته طلع متحشرج، حاول يمسك إيد نرمين عشان يهدّي اللعب قبل ما القنبلة تنفجر: “طب اهدي بس يا نيمو واقعدي عشان الموضوع مش مستاهل العصبية دي.. بابا كلمني وقالي إن.. إن نادين بنت عمي رجعت من كندا النهاردة.”
نرمين رفعت حاجبها وبصتله ببرود قاتل: “أها.. حمد الله على سلامتها، تروح تنور بيت عمها في القاهرة.. إيه بقى اللي مخليك عرقان كدا ومخطوف؟”
طارق حك راسه ولَف وشه الناحية التانية وهو بيقول بسرعة ومن تحت ضرسه: “ما هو بابا قَالها إني في الغردقة وهي حجزت وجاية بكرة تقعد معانا يومين في الفيلا هنا عشان تغير جو.”
في ثانية واحدة، ملامح نرمين اتحولت من البرود لبركان غضب صامت، عينها وسعت، ونفست نفس طويل وهي بتبص لطارق اللي كان مستني الإعصار.
“نادين؟” نرمين قالتها بنبرة صوت واطية بس مرعبة، “نادين دي اللي كنت بتجري وراها وأنت عندك 18 سنة؟ نادين اللي كانت بتبعتلك صورها من كندا وتقولك وحشتني يا طروقة؟ جاية تقعد معانا.. في فيلتنا.. يومين؟”
طارق جِري عليها وحضن وسطها وحاول يبوس كتافها عشان يمتص غضبها: “وحياة غلاوتك عندي يا نيمو أنا ماليش ذنب! ده بابا اللي دبسني ودبسها، وأنا مكنتش أعرف أصلاً إنها نزلت مصر! وبعدين دي ذكريات مراهقة عبيطة، أنتي اللي في القلب يا وحش الكون.”
نرمين زقته من صدره بقوة، وعينيها بتطلع شرار، وقفت قدامه وبدأت تتنقل في التراس رايحة جاية وهي بتتوعد: “ماشي يا طارق.. الشاذلي بيه بيحطني قدام الأمر الواقع؟ تمام! البت دي تيجي وتنور، بس وحياة ابني يوسف لو لمحتها بس بتبص لِك نظرة كدا ولا كدا، أو اتدعلت بكلمة ‘طروقة’ دي تاني، هقلب بكرة الغردقة دي لساحة خلاف، وهتشوف نرمين التانية خالص!”
طارق رغم رُعبه من غيرتها، مكنش قادر ينكر إن شكلها وهي غيورة كدا بيموت فيه وبيخليه يعشقها أكتر. قرب منها تاني بخطوات بطيئة، حاصرها على سور التراس، وبص في عينيها بجرأة وشغف: “يعني أنتي مش واثقة في طروقة بتاعك؟” انجى الخطيب
نرمين لفت وشها بغيظ: “أنا واثقة فيك أنت، مش واثقة في السهونة بتاعة بنات كندا.”
طارق مَيل عليها وباسها بوسة عميقة ورقيقة من رقبتها لحد شفايفها، همس في ودنها وهو بيشدها لحضنه أكتر: “طب سيبك من كندا وسيبك من بكرة.. إحنا لسه في النهاردة، واليوم ده بتاعي أنا وأنتي وبس.. تعالي جوه أثبتلك إن مفيش ست في الدنيا تملى عيني غيرك.” نرمين استسلمت لحضنه وضيعت غضبها في أنفاسه، وهي بتفكر في سرها إزاي هتستقبل “نادين” بكرة وتوريها مين هي ست البيت دي ومين هي ملكة قلب طارق.
…………
تاني يوم الصبح، الشمس كانت حامية ومالية جنينة الفيلا في الغردقة، ونرمين كانت واقفة في الريسبشن وعينيها على الباب، ملامحها مصلبة وفيها تحدي مرعب. أول ما جرس الباب رن، طارق قام بسرعة عشان يفتح، بس نرمين حطت إيدها على صدره وزقته لورا بنظرة حاسمة وقالتله بصوت واطي ومسموع: “خليك مكانك يا طارق.”




