عدى يومين وحور مابتردش على مكالماتي، وكنت كل شوية أدخل أشوف آخر ظهور ليها وأبعتلها رسايل، لكنها كانت بتتجاهلني تمامًا. وفي اليوم التالت لقيت حماتي بتتصل بيا، رديت عليها، فقالتلي بعتاب:
ـ إنت عملت إيه في بنتي؟
حور عمرها ما نامت عندي وهي مكسورة بالشكل ده!قولتلها: ـ يا طنط الموضوع سوء تفاهم، وحور مكبرة الحكاية. ردت بغضب: ـ سوء تفاهم إيه؟ إنت بتكلم صاحبتها من وراها وبتحاول توقعها فيك، ولما البنت رفضتك فضلت تحاصرها! إنت شايف بنتي قليلة للدرجة دي عشان تعمل فيها كده؟
قولتلها: ـ أنا غلطت، بس الموضوع مكنش يستاهل إنها تسيب البيت. قالتلي: ـ الغلط مش إنك أعجبت بواحدة، الغلط إنك نسيت إن عندك مرات بتحبك وواثقة فيك، وبدل ما تحافظ عليها استغليت ثقتها عشان توصل لصاحبتها. قفلت معايا وأنا متضايق، وقررت أروح أجيب حور بنفسي.
روحت بيت حماتي، وأول ما حور شافتني قالت لأمها:
ـ سيبينا لوحدنا يا ماما. دخلنا الأوضة، وقلتلها: ـ يلا يا حور، كفاية لحد كده، ارجعي بيتك. بصتلي وقالت: ـ بيتي؟ إنت لسه فاكر إن ده بيتي؟ أنا من ساعة ما عرفت حقيقتك وأنا مش عارفة إزاي كنت عايشة معاك ومطمنة.
قولتلها: ـ أنا جوزك، ومش هقبل إنك تفضلي هنا. ردت بهدوء: ـ وإنت فاكر إن كلمة جوزي دي هتديني أمان؟ أنا مش هرجع معاك دلوقتي، ولما أرجع هيكون عشان آخد باقي حاجتي، مش عشان أرجع أعيش معاك. سألتها: ـ يعني إنتِ ناوية تطلقي؟
بصتلي وقالت: ـ أنا كنت فاكرة إنك بتحبني، لكن واضح إنك بتحب وجود واحدة جنبك تديك اهتمام، وأول ما تشوف واحدة تانية تعجبك تجري وراها. وأنا مش مستعدة أقضي عمري مع راجل كل ما يعجبه وش جديد ينسى مراته.
وسابتني وخرجت من الأوضة، وأنا لأول مرة أحس إن حور ممكن تكون فعلًا قررت تنهي جوازنا، لكن اللي صدمني أكتر إني لقيت صاحبتها باعتالي رسالة بتقول فيها:
«أتمنى تكون فهمت إنك خسرت مراتك بسبب تصرفاتك، وياريت متحاولش تتواصل معايا تاني».
رجعت البيت وأنا في قمة عصبيتي، وفضلت أفكر إزاي كل حاجة اتقلبت عليا بالشكل ده، كنت فاكر إن حور هتزعل يومين وترجع، لكن الأيام عدت وهي مصممة على موقفها. بعد أسبوع اتصلت بيا وقالت إنها عايزة تيجي تاخد باقي حاجتها، وافقت وقلت لنفسي دي فرصتي أتكلم معاها وأصالحها.
جت حور ومعاها أمها، وبدأت تجمع هدومها وحاجتها، وأنا واقف مستنيها تخلص، لحد ما مقدرتش أستحمل وقلتلها:
ـ إنتِ بجد هتضيعي عشر سنين جواز عشان غلطة؟بصتلي وقالت: ـ عشر سنين جواز دول كانوا غاليين عندي، وعشان كده وجعوني أكتر، أنا مكنتش متخيلة إن الراجل اللي ائتمنته على نفسي وبيتي ممكن يبص لصاحبتي ويجري وراها بالشكل ده.
قولتلها: ـ أنا معملتش حاجة، وكل اللي حصل إني اتعرفت عليها. ردت: ـ وإنت شايف إنك لما خبيت عني وخدت رقمه من موبايلي وفضلت تطاردها واتصلت بيها وقابلتها، كل ده اسمه اتعرفت عليها؟!سكت، لأنها كانت بتتكلم عن حاجات مفيش عندي رد عليها.
