
كنت قاعدة في البيت، ولقيت حساب غريب باعتلي طلب متابعة على إنستجرام.
الحساب مفيهوش صورة شخصية، وعدد متابعيه قليل جدًا.
قبلت الطلب بدافع الفضول، وبعد دقائق وصلتني رسالة إنتِ مرات عمر، صح؟
استغربت وكتبت أيوه، مين؟
رد أنا عارف إنك اكتشفتي إن ليلى صاحبة حساب الفيديوهات.
اتوترت وكتبت إنت مين وعايز إيه؟
رد بعد شوية الموضوع مش زي ما إنتِ فاكرة. ليلى مش عارفة إن فيه فيديوهات تانية اتنشرت باسمها.
قلبي بدأ يدق بسرعة. حصري علي روايات واقتباسات
كتبتله يعني إيه فيديوهات تانية؟
بعتلي رابط لحساب مختلف، ولما فتحته لقيت فيديوهات لليلى بنفس طريقة التصوير، لكن فيه اختلاف واضح في بعض التفاصيل.
رجعت أسأله إنت جبت الفيديوهات دي منين؟
رد فيه حد عنده نسخ من كل فيديوهاتها، وبدأ ينشرها على حسابات تانية من غير إذنها. الأفضل إنك تكلميها قبل ما الموضوع يكبر. هي اتعرض عليها تدفع مبلغ كبير مقابل إن الفيديوهات دي متتنشرش.
اتجمدت مكاني، وكتبت بسرعة مين اللي بيطالبها؟
الرد جه في ثواني الشخص اللي عمر رفضه من البداية.
أول ما قرأت الجملة، افتكرت زياد.
حاولت أسأله عن تفاصيل أكتر، لكن الحساب اختفى فجأة.
فضلت طول اليوم بفكر في الكلام اللي قريته، لحد ما قررت أكلم ليلى بنفسي.
اتصلت بيها من رقم مختلف، وبعد محاولتين ردت.
أول ما عرفت إن أنا اللي بتكلم، قالت بحدة إنتِ عايزة إيه يا ملك؟
قلت بهدوء أنا مش جاية ألومك ولا أتكلم معاكي في موضوع عمر. أنا بس عايزة أطمن عليكي.
ردت بسخرية أكيد عمر بعتك عشان تعرفي أنا بعمل إيه.
قلت عمر ميعرفش إني بكلمك، بس فيه حد بعتلي كلام عن الفيديوهات بتاعتك، وقال إن فيه شخص بيطالبك.
سكتت تمامًا، وبعد لحظات سألتني بصوت متوتر هو قالك إيه بالظبط؟
حكيتلها عن الحساب المجهول، وعن الفيديوهات اللي اتنشرت من غير علمها، وعن الشخص اللي بيطلب منها فلوس.
سمعتها بتاخد نفس طويل، وبعدها قالت أنا كنت عارفة إن الموضوع هيحصل في يوم من الأيام… فيه شخص معاه فيديوهات وصور أنا مكنتش عايزة حد يشوفها، وبيقولي إنه ينشرها لو مدفعتلوش.
سألتها بقلق هو زياد؟
ليلى سكتت شوية، وبعدها قالت أنا مش متأكدة إنه لوحده، بس هو أول شخص شكيت فيه.
قلت بسرعة طب ليه مكلمتيش عمر؟ ده أخوكي، مهما حصل بينكم مش هيسيبك.
ردت بصوت مكسور أنا قلقانة يا ملك… مش من الفيديوهات بس، أنا قلقانة من اللي ممكن يحصل لعمر لو عرف الحقيقة. أرجوكي، متقوليلوش أي حاجة دلوقتي. أنا هحاول أحل الموضوع.
قفلت المكالمة، لكن كلامها فضل يرن في ودني.
بالليل، عمر رجع من الشغل وكان بيتكلم في التليفون مع واحد صاحبه.
سمعته بيقول أنا مش فاهم زياد رجع يظهر ليه بعد كل الفترة دي، وإيه اللي عايز يوصله…
استنيت لما قفل وسألته هو زياد رجع يتواصل مع ليلى؟
بصلي باستغراب وقال إنتِ عرفتي منين؟
قلتله إني سمعته بيتكلم في التليفون.
اتنهد وقال واحد صاحبي شافه من يومين، وكان بيسأل عن ليلى. أنا مش مرتاح للموضوع ده خالص.
سألته هو إنت عرفت عنه إيه زمان وخلاك ترفضه بالشكل ده؟
بصلي شوية، وبعدها قال أنا مش عايز أفتح الموضوع ده دلوقتي، بس صدقيني، لو زياد رجع لحياتها، لازم أفهم هو عايز منها إيه.
قبل ما أرد عليه، موبايلي نورت برسالة جديدة من نفس الحساب المجهول.
فتحتها، ولقيت صورة لصفحة فيها مجموعة فيديوهات، وتحتها رسالة دي آخر فرصة ليها قبل ما ننشر كل حاجة.
كتبت إنت عايز منها إيه؟
الرد جه بسرعة خليها تبعت المبلغ اللي طلبناه، وإلا الفيديوهات هتوصل لكل الناس اللي تعرفهم.
سألته وليه بتبعتلي أنا؟
وصلني رد خلاني أحس إن الأرض بتتحرك من تحتي لأننا مش عايزين فلوس ليلى بس… إحنا عايزين عمر!
فضلت أبص للرسالة، مش فاهمة إيه علاقة جوزي بالموضوع.
وبعد ثواني وصلتني صورة تانية لعمر واقف قدام مبنى شركة الشحن اللي بيشتغل فيها، وتحتها جملة قولي لجوزك إن الماضي اللي حاول يخبيه رجع يطارده.
في اللحظة دي سمعت صوت عمر بيناديني من الصالة ملك، إنتِ بتعملي إيه؟
قفلت الموبايل بسرعة.
دخل الأوضة وبصلي باستغراب، وبعدها قال إنتِ كويسة؟ وشك متوتر ليه؟
حاولت أتكلم، لكن موبايله رن فجأة من رقم مجهول.
رد عمر، وسمعته بيقول أيوه، مين معايا؟
فضل ساكت ثواني، وبعدها ملامحه اتغيرت تمامًا.
قال بصوت منخفض إنت جبت الرقم ده منين؟… إنت بتتكلم عن إيه؟
أنهى المكالمة وبصلي.
سألته بقلق مين كان؟
رد وهو بيحاول يخفي توتره محدش… واحد بيهزر هزار سخيف.
لكن قبل ما يخرج من الأوضة، وصلتني رسالة أخيرة من الحساب المجهول فيها تسجيل صوتي مرفق برسالة اسمعي التسجيل ده كويس، وبعدها قرري إذا كنتِ لسه عايزة تحمي جوزك ولا لأ.
ضغطت على التسجيل…
في البداية سمعت صوت زياد، وبعده صوت عمر.
لكن الجملة اللي قالها عمر في التسجيل خلت إيدي تتجمد!
حكايات_مريم_السيد




