وقت ماتجوزت مراتى مكتبتش قايمه ولا مضيت على اى ورق يقول إن ليها عندى حقوق شروق بنت عمى وعشان بابا مايزعلش عمى قرر إنه مايكتبش قايمه وقال أنا بثق فى اخويا وتم الجواز بناءاً على رغبه بابا لكن أنا من جوايا مكنتش بحبها ولا حاسس ناحيتها أى مشاعر لكن اللي حصل إن شروق كانت بتحاول تقرب مني بكل الطرق،
وأنا كنت دايمًا ببعد عنها، لا كلمة حلوة، ولا اهتمام، ولا حتى كنت بحاول أخليها تحس إنها مرغوب فيها في حياتي.
ومع ذلك، كانت بتتحمل، وتبرر لنفسها معاملتي، وتقول يمكن مضغوط في الشغل، يمكن لسه مش متعود على الجواز، ويمكن الأيام تغيره. وعدت سنة ورا سنة، وشروق كانت بتقوم بدورها كزوجة على أكمل وجه، تهتم ببيتي وأكلي ولبسي، وتستقبل أهلي بابتسامة، وتعمل كل اللي تقدر عليه عشان ترضيني، وأنا كنت باخد كل ده باعتباره واجب عليها، من غير ما أفكر للحظة هي بتدفع تمن إيه عشان تفضل محافظة على بيتها.
الغريب إن ماما كانت دايمًا بتنتقدها، مهما عملت، تلاقي حاجة تمسك فيها، مرة تقول إنها مش بتعرف تتصرف، ومرة تقول إنها باردة ومابتعرفش تكسب جوزها،
ومرة تانية تقعد تقارن بينها وبين بنات اخواتها ، وأنا كنت سايبها تعمل اللي هي عايزاه، لا بدافع عن مراتي ولا حتى بحاول أوقف أمي عند حدها.
والحقيقة إن ماما من يوم ما شروق اتخطبتلي وهي مش طايقاها، بسبب خلاف قديم بينها وبين مرات عمي، خلاف ملوش أي ذنب فيه لا أنا ولا شروق،
لكن ماما كانت شايفة إن جوازنا فرصة إنها تضايق مرات عمي في بنتها، ولما لقتني مش بحب شروق، استغلت ده لصالحها.
لحد ما في يوم، كنت قاعد مع ماما في الصالون، وفجأة قالت لي وهي بتقلب في موبايلها:- إنت ناوي تفضل عايش كده لحد إمتى؟بصيت لها باستغراب وقلت:- عايش إزاي يعني؟- يعني متجوز واحدة إنت مش بتحبها، ولا هي عاجباك، ولا حاسس إنك عايش حياتك.
إنت لسه صغير يا حبيبي، ومن حقك تختار واحدة تحبها وتحبك، واحدة تحس معاها إنك متجوز بجد. ضحكت بسخرية وقلت: – هو أنا اللي اخترتها أصلًا؟ إنتوا اللي زنّيتوا عليا لحد ما وافقت.
هزت راسها وقالت:- خلاص، اللي حصل حصل، بس ده مش معناه إنك تفضل مكمل بنفس الطريقة. اتجوز عليها، وإيه المشكلة؟ ما إنت مش كاتب لها قايمة، ولا مضيت على حاجة، وهي لو زعلت تروح لأهلها، وإنت تبقى عشت حياتك.
بصيت لها وسكت، مش لأن كلامها مقنع، لكن لأن الفكرة نفسها كانت بدأت تدور في دماغي. كنت شايف إن عدم وجود قايمة معناه إن شروق مش هتقدر تعمل لي حاجة،وانا مش ملزم ناحيتها بحاجة وإن أهلها مش هيعرفوا يضغطوا عليا لو قررت أتجوز غيرها.
ـ وإنتِ شايفة إن ده حل؟ردت من غير تردد:- طبعًا حل، وإنت مش هتكون أول واحد يتجوز على مراته. وبعدين إنت مش بتحبها، يبقى ليه تحرم نفسك من واحدة قلبك يختارها؟الكلام دخل دماغي، وبدل ما أفكر في ظلم شروق، أو في العِشرة اللي بينا، فضلت أفكر في نفسي، وفي إني عايز أعيش مع واحدة أحس ناحيتها بمشاعر، حتى لو كان ده على حساب واحدة مالهاش ذنب غير إنها اتجوزت راجل مش بيحبها.
وفى وسط الكلام عرضت عليه اتجوز هنا بنت اختها هنا كانت دلوعه وحلوه وأنا كنت معجب بيها زمان ويمكن ده السبب اللى انها قالتلى على منه عشان عارفه أنى كنت معجب بيها وافقت وهى قالتلى هتكلم اختها وترد عليه وفعلاً بعد يومين ماما كلمت اختها ووافقت على الجواز بس كان شرطها اطلق شروق واتجوزها وانا عشان ماعنديش غير الشقه اللى قاعد فيها وافقت وقررت انى اطلق شروق وامشيها بشنطه هدومها واجدد العفش واتجوز هنا وقررت انى اطلقها غيابى واكلم بابا بعدها اعرفه قرارى تاني يوم صحيت من النوم وأنا واخد قراري،
مش هفضل أأجل في الموضوع أكتر من كده، خصوصًا إن ماما كلمت أختها واتفقت معاها على كل حاجة، ومبقاش فاضل غير إني أنهي جوازي من شروق وأبدأ حياتي الجديدة مع هنا.
نزلت من أوضتي لقيت شروق في المطبخ بتحضر الفطار، وأول ما شافتني ابتسمت وقالت:- صباح الخير، الفطار هيجهز كمان شوية، عملتلك البيض اللي بتحبه. بصيت لها ببرود وقلت:- أنا مش هفطر، عندي مشوار مهم. رفعت عينيها ليا وقالت:- طيب استنى أعملك قهوة تشربها قبل ما تنزل.
قولتلك مش عايز حاجة يا شروق، هو لازم كل حاجة أقولها مرتين؟سكتت وبصتلي بحزن، وبعدها قالت بهدوء:- حاضر، براحتك. خرجت من البيت وأنا مش فارق معايا نظرة عينيها ولا حتى الطريقة اللي صوتها اتغير بيها، وبدل ما أراجع نفسي وأفكر أنا رايح أعمل إيه في واحدة عاشت معايا سنين، كنت شايف إني أخيرًا هتخلص من الجوازة اللي اتفرضت عليا.
روحت للمأذون وطلبت منه يجهز إجراءات الطلاق، وبعد ما خلصت كل حاجة ورجعت البيت، دخلت لقيت شروق قاعدة في الصالة بتطوي الهدوم. بصتلي وقالت:- إنت جيت؟ أعملك الغدا؟رديت عليها ببرود:- لأ، أنا جاي أقولك حاجة، وإنتِ لازم تسمعيني للآخر من غير دوشة.
حطت الهدوم من إيديها وبصتلي باهتمام، وقالت:- خير يا حبيبي، في إيه؟الكلمة دي بالذات استفزتني، يمكن لأني عارف إنها لسه بتعاملني على إني جوزها وحبيبها، في الوقت اللي أنا كنت فيه بجهز أنهي علاقتنا من غير ما أديها حتى فرصة تفهم إيه اللي بيحصل.
