2
وقفت قدام السرير، وإيدي في إيدها، وحسيت بصدمة خفيفة. طلبها كان مفاجئًا بالنسبة لي؛ مش لأنه غلط في الأصل، بس لأني كنت خايفة على بناتي. الكبيرة عندها سبع سنين، والصغيرة خمس سنين، وعقلهم الصغير لسه مش هيستوعب يعني إيه تيتا اللي كانت بتبخل عليهم باللقمة، بقت دلوقتي نايمة على السرير ومش قادرة تقوم.
كنت خايفة منظر التعب والضعف ده يأثر في نفوسهم، أو يزرع جواهم خوف من العجز والزمن، وفي نفس الوقت، كنت خايفة أمنعهم فيندموا بعدين لو حصلها حاجة، وتقول لنفسها أنا منعتهم يشوفوا جدتهم وهي في آخر أيامها.
سحبت إيدي بالراحة من إيدها، وابتسمت لها ابتسامة هادية عشان أطمنها، وقلت بصوت حنين:
حاضر يا طنط، عيونيا بكرة إن شاء الله، لما البنات يصحوا ويهدوا، هدخلهم لك يسلموا عليكي، بس بالراحة عليهم عشان هما لسه صغيرين وخايفين عليكي من التعب.
وجهها اتملى رضا وراحة، كأن جبل انزاح من على صدرها، وقالت بصوت مكسور:
كتّر خير أصلك يا بنتي، ربنا يبارك لك فيهم ويحفظهم من كل أذى.
سبتها وطلعت من الأوضة، ولقيت محمود قاعد في الصالة، عيونه متعلقة بالباب مستنيني أخرج. أول ما شافني، قام وقف بسرعة وجا ناحيتي كأنه خايف أكون اتخانقت معاها أو زعلت.
ها يا أم البنات؟ طمنيني، عملتِ إيه؟
بصيت له وقلت وأنا باخد نفس طويل:
كل خير يا محمود. أكلتها وعدلت لها نومتها، وطلبت مني طلب عايزة تشوف البنات قبل ما ترحل وتسلم عليهم.
محمود اتنهد براحة، وقال بصوت واطي:
ربنا يجعله في ميزان حسناتك يا أم البنات. إنتِ أصيلة وابن حلال، وعمري ما كنت هقدر ألومك لو رفضتي، بس طريقتك دي هي اللي بتخليني أحترمك وأحبك كل يوم أكتر من اللي قبله.
قعدت جنبه على الكنبة، وابتديت أفكر بصوت عالي:
مش حكاية أصل وبس يا محمود، الحكاية إني بفكر في البنات. بكرة الصبح هندخلهم عندها، بس لازم نقعد معاهم ونفهمهم إن تيتا تعبانة ومحتاجة دعواتهم، مش عايزين نزرع في قلوبهم حقد ولا غل من حد، كفاية الوجع اللي شافوه زمان.
محمود هز راسه بتأييد وقبّل رأسي بحب، وقال:
اللي تشوفيه صح يا أم البنات، أنا معاكي في كل خطوة.
تاني يوم الصبح، الشمس طلعت، وصحيت بدري زي عادتي. جهزت فطار البنات، وقعدت معاهم على سفرة الصالة. الكبيرة بصت لي وقالت ببراءة:
ماما، هو إحنا ليه مبقيناش نقعد عند تيتا زي الأول؟ هي زعلانة منا؟
السؤال نزل عليا زي القلم، بس مسكت نفسي، وقعدت على ركبي قدامهم، ومسكت إيد الكبيرة وإيد الصغيرة، وبابتسامة هادئة قلت لهم:
لا يا حبايبي، تيتا مش زعلانة منكم خالص. بس تيتا دلوقتي تعبانة جداً ونايمة في السرير، ومش قادرة تتحرك ولا تخدم نفسها.
الصغيرة بصت لي بقلق وقالت:
يعني تيتا عيانة يا ماما؟ طب هي هتروح المستشفى زي جدو الله يرحمه؟
حضنتهم الاتنين بحب، وقلت:
لا يا قلبي، هي في بيتها، بس هي محتاجة مننا كلنا إننا نقف جنبها ونساعدها عشان هي عجوزة ومش قادرة. وعارفين؟ هي طلبت إنها تشوفكم وتسلم عليكم.
البنتين بصوا لبعض باستغراب، فالكبيرة قالت بتردد:
طب هو إحنا ممكن ندخل نسلم عليها يا ماما؟ مش هتعملنا زي زمان؟
قلبي وجعني من جملتها، وحسيت بغرزة في صدري، بس رديت بثبات وحنان:
لأ يا حبيبتي، تيتا دلوقتي طيبة خالص ومش هتعمل كده تاني. دي محتاجة حبكم ودعواتكم ليها. يلا بينا ندخل نسلم عليها ونطلع.
قومتهم معايا، وضبطت هدومهم، ودخلت أنا وهما أوضة حماتي.
أول ما دخلنا، عيون حماتي لمعت بالدموع، وبصت للبنات بلهفة كأنها شافت الدنيا وما فيها. فتحت دراعاتها الضعيفة وقالت بصوت مهتز:
تعالوا تعالوا يا بنات محمود، تعالوا في حضن تيتا.
البنات وقفوا في الأول مكسوفين ورايا، بس أنا دفعتهم بحنان وقلت: يلا يا حبيباتي، سلموا على تيتا.
الكبيرة قربت الأول بحذر، فحملتها حماتي وضمّتها لصدرها وبكت بحرقة، وقالت لها بصوت متهدج:
سامحيني يا حبيبتي، سامحيني يا بنتي، تيتا كانت وحشة وظلمتكم، بس والله العظيم بحبكم زي عمامكم وأكتر.
والصغيرة قربت كمان، فحطتها في الناحية التانية، وبقيت البنات في حضن الست اللي كانت من شوية قاسية معاهم. والجميل في الأطفال إن قلوبهم بيضاء مبتشيلش.
الكبيرة بعد ثواني لفت إيديها حوالين رقبة حماتي وقالت ببراءة:
خلاص يا تيتا، إحنا مسامحينك، بس ما تبقيش تعبانة تاني.
الكلمة دي كانت كفيلة تهز الأوضة كلها، ولقيت حماتي بتبكي بصوت عالي، وأنا نفسي نزلت دمعتي في صمت. حسيت ساعتها إن ربنا بيطهر البيت كله من الحقد والوجع القديم، وإن القلوب بتتصافي بفضل براءة الأطفال وطيبة الأصل.
عدت الأيام، وبقيت أنا المسؤولة الأولى عن كل شؤون حماتي؛ أكلها، شربها، ودواها، وخدمتها كأنها أمي اللي خلفتني. كنت بعمل ده لوجه الله، وكمان عشان جوزي اللي كان كل يوم بيشوف بعينه إزاي أنا صاينه عرضه وبيته.
بس الحياة مش بتمشي على وتيرة واحدة، والمشاكل دايما بتظهر من حيث لا تدري.
في يوم، وأنا في المطبخ بجهز الغدا، لقيت باب الشقة بيخبط بعنف. استغربت، لأن الوقت ده مش ميعاد جوزي، والساعة لسه الظهر. سيبت اللي في إيدي وفتحت الباب، ولقيت قدامي جارتنا أم سعيد، ست طيبة بس لسانها طويل وبتحب تعرف كل صغيرة وكبيرة في البيت والشارع.
أول ما فتحت، دخلت من غير ما تستأذن، وقالت بصوت عالي وفيه نبرة تعجب واضحة:
يا مصيبتي السودا يا أم البنات! إنتِ قاعدة هنا وغايبة عن الدنيا، ومش عارفة إيه اللي بيتقال بره عنكم في الشارع والمنطقة كله؟!
