الجزء الثاني حكايات مني السيد حصري
وقفت أميمة في وسط شارع جامعة الدول، ورجليها مش شايلاها، كأن الأسفلت تحتها بيميد. الهواء كان ساقع وبيلسع في وشها، ونور الإعلانات النيون الملونة على واجهات المحلات الكبيرة كان بيضرب في عينيها ويزغللها. العربيات الفارهة بتجري بسرعة، والناس بتضحك وخارجين من المطاعم والكافيهات شبعانين ومبسوطين، مفيش حد حاسس بالبنت اللي واقفة على الرصيف، حاضنة كيس بلاستيك قديم فيه هدوم الشغل المبلولة، وتليفونها في إيدها حتة حديدة صامتة وسودا بعد ما بطاريته .
حاولت تدوس على زرار الباور كذا مرة، يمكن ينطق، يمكن يفتح ثانية واحدة بس ترن رنة واحدة على سامح يجيلها، مفيش فايدة.. الشاشة سودا وضلمة زي بختها في اللحظة دي. مسحت وشها بكُم عبايتها، وافتكرت منظر الأكل وهو مدلوق على البلاط.. الرز الأبيض المفلفل وطشة الملوخية اللي عملتها بحب من صلب شقاها، متبعترة تحت جزمة وائل المدير. كل ما تفتكر ضحكته الصفرا وصوته وهو بيقول مش هسمح لبت جاية من الغيط بريحة الطين تنافس مطبخي، قلبها يتقبض من القهر، وعينها تغيم بالدموع.
يا
رب.. مالهاش غيرك يا رب، أنا لا سړقت ولا نهبت، أنا كنت بجري على لقمة عيش بالحلال ومستخسرتش فيهم لقمتي، همست بالكلام ده لنفسها وهي بتبلع غصتها، وخدت خطوة ورا التانية، وبدأت تمشي على رجليها في اتجاه كوبري الدقي عشان تركب ميكروباص يوديها فيصل. ما كانش معاها فكة غير شوية فكة متبقية في جيب العباية، والباقي كان في الكيس القماش اللي محوشاه، وخاېفة تطلع منه قرش واحد.
المسافة كانت طويلة والشنطة تقلت على كتفها، بس القهر اللي جواها كان بيزقها أكتر من رجليها. وصلت الموقف بالعافية، وركبت ميكروباص فيصل، وقعدت جنب الشباك، ساندة راسها على الإزاز البارد، وبتبص على الشوارع وهي بتجري. في دماغها مفيش غير صورة واحدة صورة أبوها عم إبراهيم وهو قاعد على حافة الترعة في المنوفية، لابس الجلابية الكاستور اللي كمامها مهدبة، حاطط إيده على خده، وبيبص للغيط اللي الأرض فيه شققت، والمحصول ھيموت من العطش لأن ماكينة الري عطلانة وبتطلع دخان أسود، ومستني بنته، مستني أميمة اللي في مصر تبعتله الأمل اللي يصلح بيه الماكينة.
لو عرف إني اترفدت هيحصله إيه؟ ده راجل مريض
سكر والضغط عالي عليه، ومش هيستحمل الصدمة، قالت لنفسها، وقررت من اللحظة دي إنها مش هتنطق بكلمة لأهلها، ولا هتقول إنها سابت الشغل، لحد ما تدبر أمرها.
نزلت في شارع العشرين في فيصل، الشارع كان زحمة ودوشة البياعين والتوكاتك، بس أميمة كانت ماشية زي التايهة. طلعت السلالم القديمة لبيت الست أم رضا، خطوة خطوة، وفتحت الباب بالراحة عشان متصحيش الست الكبيرة. بس أول ما فتحت، لقت النور والع في الصالة، والست أم رضا قاعدة على الكنبة ولابسة نضارتها وبتقرأ في المصحف.
أم رضا رفعت عينها، وبصت في وش أميمة، وبعين الأم اللي شافت من الدنيا ياما، عرفت على طول إن في مصېبة. نزلت المصحف على الطربيزة، وقالت بصوت دافي وحنين مالك يا بنتي؟ وشك ولونك رايح في داهية كده ليه؟ فيكي إيه يا أميمة؟
أميمة رمت الكيس من إيدها، وجريت اترمت في حضڼ الست العجوزة، في عياط هستيري، عياط كان محپوس طول الطريق، عياط القهر والذل والشقا اللي ضاع في لحظة. أم رضا طبطبت على ضهرها، وفضلت تقرأ عليها آيات قرآنية وتهديها استهدي بالله يا ضنايا.. وحدي الله وقولي لا إله إلا
دي تستاهل حړقة دمك دي كلها.. قوليلي بس إيه اللي حصل ومين داسلك على طرف؟
قعدت أميمة على الأرض جنب رجليها، وحكتلها كل حاجة من طق طق للسلام عليكم؛ حكتلها عن البنات اللي كانوا بيطلبوا الأكل، وعن الفلوس القليلة اللي كانت بتاخدها، وعن المدير وائل اللي كسر نفسها ودلق الأكل في الأرض ومضاها على استمارة فصل من غير ما تاخد حتى يوميتها الأخيرة.
أم رضا وشها احمر من الڠضب، وقالت وهي بټضرب كف على كف ابن الحړام! الهي ربنا يكسر بخاطره زي ما كسر بخاطرك! ده راجل مريض وحاقد، شاف رزق ربنا بين إيديكي فغيرته وغروره عموه! بس قوليلي يا أميمة.. انتي زعلانة عشان اترفدتي من مسح البلاط؟! ده ربنا اللي نجاكي يا هبلة! ربنا بيقفل باب ملوش عازة عشان يفتحلك طاقة نور متخطرش على بالك!
أميمة رفعت وشها وقالت بكسرة طاقة نور إيه بس يا خالة أم رضا؟! أنا معيش فلوس تكفيني الشهر ده، وإيجار الأوضة، وغير كده ماكينة الري بتاعة أبويا.. أبويا مديني تحويشة عمره ومستنيني، لو المحصول بار البيت هيتخرب وأبويا ھيموت بحسرته!
أم رضا قامت
من مكانها، ودخلت المطبخ ورجعت بكوباية مية بسكر دافية، ناولتها لأميمة وقالت بحزم اشربي بس الأول وروقي دمك. اسمعيني كويس يا بت.. اللي بيعرف يعمل طعم زي اللي بتعمليه ده، مايقعدش يمسح ترابيز الناس وخدمتهم! هو المدير ده مش طردك عشان أكلك أحسن من أكل المطعم بتاعه؟ يبقى انتي عندك صنعة تسوى دهب، صنعة هو نفسه بېموت ويجيب شيف برقم وقدره عشان يعمل ربعها وما بيعرفش!
الكلام ده رن في ودان أميمة زي الجرس، بس برضه الخۏف كان ماليها أيوا يا خالة، بس أنا معيش راس مال.. أنا يدوبك حيلتي ألفين جنيه من اللي حوشتهم من بيع العلب غير السبعة آلاف بتوع أبويا اللي حلفاني مالمس منهم قرش عشان دول أمانة الأرض!
أم رضا ابتسمت ابتسامة هادية وقالت مين قالك إنك محتاجة راس مال كبير عشان تبيعي لقمة؟ إحنا هنبدأ من هنا، من المطبخ ده! ومطبخي تحت أمرك، والحلل والبوتاجاز بتوعي هما بتوعك، والقرشين اللي معاكي ينزلوا الصبح ييجوا بيهم بضاعة.. وسامح ابن حلال، الصبح لما ييجي هيفهمنا إيه اللي ممكن يتعمل.
في اللحظة دي، الباب خبط خبطات
سريعة وقلقة. أم رضا استغربت وقامت تفتح، لقت سامح واقف برة ونهجان، ولابس هدوم الشغل وشكله قالب الدنيا. سامح أول ما لمح أميمة قاعدة جوة، اتنهد تنهيدة طويلة وقال الحمد لله إنك هنا يا أميمة! تليفونك مقفول من المغرب، روحتلك المطعم أسأل عليكي، لقيت أم رحاب واقفة على الباب پتبكي وقالتلي على اللي الحيوان اللي اسمه وائل عمله معاكي! والله لو ما كنت خفت عليكي ومكنتش لاقيكي، كنت دخلت مسكت فيه ومسبتوش غير في القسم!
أميمة وقفت وبصت لسامح بامتنان كويس إنك ما عملتش مشاكل يا سامح، هو راجل واصل والمطعم ليه صحاب تقال وإحنا غلابة مش حمل محاكم وقضايا.. الحمد لله على كل حال.
سامح دخل وقعد على الكرسي، وقال بعصبية ورجولة باينة في صوته ولا غلابة ولا حاجة، الحق مبيضيعش. أنا سألت أم رحاب، قالتلي إن البنات كلهم متضامنين معاكي ورافضين ياكلوا من أكل المطعم، وكلهم زعلانين عشانك. اسمعي بقى يا أميمة.. أنا عندي ليكي فكرة، والخير اللي في دماغك ده ميروحش هدر.
أميمة وأم رضا بصوا لسامح باهتمام، وسامح كمل وهو بيشرح بحماس أنا
طول النهار بلف بعربيتي النص نقل
على شركات المقاولات، والمخازن اللي في المنطقة الصناعية في السادس من أكتوبر وأبو رواش. هناك في آلاف العمال والموظفين والمهندسين اللي بيقضوا طول اليوم في الشمس والتراب، ومفيش حواليهم غير كافيهات بتعمل أكل تيك أواي مجمد وطعمه زي الكرتون وبأسعار تقطم الوسط! أنا لو خدت كل يوم الصبح كراتين فيها وجبات بلدي سخنة ونظيفة من عمايل إيدك ووزعتها عليهم هناك، قسماً بالله ما هترجعي بعلبة واحدة، والطلب هيكون بالدور!
أميمة عينيها وسعت، والتردد كان واضح على وشها بس يا سامح.. دول مهندسين وشركات كبيرة، هيرضوا ياكلوا أكل بيتي في علب كرتون؟ وبعدين هنعمل ده إزاي وأنا معيش إلا ألفين جنيه؟
أم رضا ضړبت كفها على رجلها وقالت بزغرة لأميمة جرى إيه يا بت يا أميمة؟! هو الأكل النضيف البلدي بيتقال عليه لأ؟! دول هيبوسوا إيديهم وش وضهر لما يلاقوا لقمة بطعم أكل أمهاتهم! وبالنسبة للألفين جنيه، يكفوا ويزيدوا كبداية، نشتري خضار طازة وفراخ ورز، ونعمل عشرين وجبة بس كتجربة بكرة وبعده.. لو مشيت، نكمل، ولو مامشيتش نبقى حاولنا بشرف ومقعدناش نندب حظنا!
سامح طلع من جيبه ألف
جنيه، وحطهم على الطربيزة قدام أميمة وقال ودول سلفة مني يا ستي عشان تجيبي بيهم علب فويل وعلب بلاستيك وشوك من سوق الجملة، ومش هاخدهم منك غير لما تبيعي أول دفعة ويكون معاكي مكسبك.
أميمة شافت في عينيهم جدعنة ولاد البلد، الجدعنة اللي ما تتقدرش بتمن، حست إن ربنا بعتلها الناس دول عشان يمسكوا إيدها من حافة الهاوية. مسحت دموعها بإصرار، وعقدت العزم وقالت توكلنا على الله.. يا رب أنت المستعان وماتحوجناش لحد.
الساعة كانت داخلة على واحدة بالليل، مفيش وقت للنوم. سامح نزل أميمة على سوق الجملة في فيصل اللي بيبقى شغال طول الليل؛ اشتروا كرتونة علب فويل محكمة الغلق، وملاعق وشوك، وشنط بلاستيك. ومن عند بتاع الفراخ اشتروا خمس فرخات طازة، وشوال بطاطس، وشوال رز مصري نضيف، وشوية توابل فريش وبصل وتوم. الفلوس اللي كانت معاها صرفتها كلها ومتبقاش في جيبها غير خمسين جنيه بس! الرهان كان على كل حاجة أو لا شيء.
رجعوا البيت الساعة اتنين ونص الفجر، ومن اللحظة دي تحول مطبخ الست أم رضا لخلية نحل حقيقية.
أم رضا قعدت على كرسي واطي تقشر التوم وتنقي الرز، وأميمة شمرت
دراعاتها، وبدأت تغسل الفراخ بالدقيق والليمون والملح والخل لحد ما بقت ريحتها زي الورد وبياضها ينور. ولعت عيون البوتاجاز الأربعة حلة كبيرة حطت فيها مية وورق لورا وحبهان وبصل وطماطم لسلق الفراخ، وحلة تانية عملت فيها تسبيكة صلصة الطماطم بالبصل المكرمل والتوم ورشة السكر الخفيفة اللي بتعدل الحموضة، وحلة تالتة كبيرة حمرت فيها الشعرية في سمنة بلدي لحد ما خدت لون دهبي مظبوط ونزلت عليها بالرز المصري وشربته من شوربة الفراخ الدسمة.
ريحة المطبخ بدأت تفوح، ريحة صواني البطاطس بالفراخ وهي بتدخل الفرن البلدي الصغير بتاع أم رضا. البطاطس كانت متقطعة شرايح متساوية، واخدة من الشوربة والصلصة والفلفل الأسود ورشة قرفة خفيفة مع فصوص التوم السليمة، والفرن شغال يدي وش تحمير للفراخ يخلي الجلد يقرمش ويدهب كأنه مشوي على الفحم.
أميمة كانت بتشتغل وعينيها مليانة تركيز، كل علبة بتعبيها كانت بتعاملها كأنها لوحة فنية في قاع العلبة الفويل تحط غرفتين كبار رز بشعرية مفلفل حبة وحبة، وعليهم قطعة بطاطس مسبكة دايبة دوب، وربع فرخة محمر ومستوي على الآخر، وفي علبة صغيرة مقفولة
تحط شوية مخلل بلدي لفت وجزرعاملينه في البيت، ومعاهم رغيف عيش بلدي طازة سامح نزل جابه من الفرن أول ما فتح الفجر.
على الساعة سبعة الصبح، كانت أميمة خلصت تقفيل 25 وجبة كاملة، متغلفة بالسلوفان ومحطوطة في كراتين نظيفة محكمة عشان تحتفظ بسخونتها، ومكتوب على كل علبة بخط إيد أميمة البسيط ألف هنا وشفا.. أكل بيتي مصري.
أميمة كانت مهدودة من التعب، عينيها حمرة من الدخان وقلة النوم، بس لما شافت الكراتين مرصوصة حسّت بفخر غريب مكنتش حاسة بيه وهي بتنضف في المطعم.
سامح جه الساعة سبعة وربع، شرب شاي مع أم رضا على السريع، وشال الكراتين حطها في كابينة العربية جنبه في مكان نظيف ودافي، وبص لأميمة وقالها بضحكة طالعة من القلب ادعيلي يا أميمة.. أنا طالع على موقع إنشاءات كبير في أكتوبر، في هناك مهندسين ومقاولين أعرفهم كويس، وربنا يجعله فاتحة خير.
أميمة وقفت في البلكونة تتابع عربيته وهي بتبعد في الشارع، وفضلت تدعي من كل قلبها ودموعها في عينيها يا رب.. استرها معاه واجبر بخاطرنا يا رب.
الساعات اللي بعد نزول سامح كانت أطول ساعات مرت في حياة أميمة. دخلت أخدت دش، ونضفت المطبخ ورجعته أحسن مما
