اتسعت عيون ليالي بصدمة وشفايفها اترعشت:
”حفلة إيه؟ أنت بتتكلم عن إيه يا جدع انت؟!”
رد عليها مندور وهو بيشاور بعينه على شقة فاخرة تانية في نفس المبنى بالزمالك، شقة متدارية ومحدش يعلم عنها حاجة، واخدها مخصوص لروقانه ومزاجه البعيد عن عيون العيلة والناس:
”شقتي اللي في الدور الأخير.. الشقة دي مفيهاش غيري أنا وانتي. هترقصيلي هناك.. هتعملي كل اللي بتعمليه في الكباريه بس ليا أنا لوحدي، لحد ما أزهق منك وأفوق أبويا من الوهم اللي هو فيه. ومن النهاردة، انتي ممرضة ولا سكرتيرة ولا أي حاجة أتحجج بيها قدام الناس، بس في الحقيقة انتي ملكي لحد ما أخلص حسابي معاكي.”
صرخت ليالي بقلة حيلة والدموع حبست في عيونها:
”أنا مش خدامة عندك ولا جواري يا مندور! ومش هعمل اللي انت بتقول عليه ده لو على جثتي!”
مسكها مندور من دراعها بمسكة حديدية وقربها منه بصرامة وقال:
”هتعمليه يا لي لي.. ورجلك فوق رقبتك. يا إما الحبس في ق.ضية ملفوفة صح، وترمي نفسك ومستقبلك في السجن، يا إما تتنفذي اللي أقوله بالمليم.. اختاري بسرعة عشان وقتي بفلوس!”
رجعت ليالي ضهرها لورا ببطء، وفي لحظة اتغيرت ملامح الخوف والرعب اللي كانت على وشّها لابتسامة شقية كاشفة عن جنانها ودهاها. رفعت حاجيبها وبصت لمندور فوق وتحت بنظرة تفحصية مليانة جرأة، وقربت منه هي المرة دي خطوة بحركة انسيابية واثقة.
عدلت حمالة فستانها ببرود وقالت بصوت ناعم ومبحوح فيه نبرة تحدي:
”تصدق يا مندور بيه؟ أنت طلعت أحلى بكتير من الصورة اللي كانت في دماغي! بقى الراجل الطويل العريض ده كله ابن الحاج توفيق؟ ده أنت القالب غالب يا راجل أنت!”
مندور ضيق عينيه باستغراب، والجمود اللي كان على وشّه اتهز ثانية من رد فعلها اللي مكنش متوقعه بالمرة. كنت مستنيها تصرخ، تعيط، أو تتوسل، بس البت طلعت أشرس وأشقى مما يتخيل.
كملت ليالي وهي بتدور حواليه ببطء، وعيونها مش مفارقة عينيه:
”حفلة خاصة في شقة الزمالك؟ ومزاجك أنت؟ أهو كده الكلام يحلو! بصراحة كده بيني وبينك.. أبوك راجل طيب وعلى راسي، بس كراكيب يا مندور! شغل عواجيز وملمس ديمديم.. إنما أنت بقى؟ أنت دماغ تانية خالص.”
وقف مندور حاطط إيده في جيبه، وباصص لها بنظرة بين الاندهاش والتحذير:
”انتي بتتجنني يا بت انتي؟ فاكرة اللعب معايا بالساهل كده؟
قربت ليالي منه أكتر لحد ماقت المسافة بينهم شبه معدومة، رفعت راسها وبصت في عينيه بثقة وجرأة هزت كبرياءه:
”مش لعب يا سي مندور.. دي حقيقة. أنا لي لي.. واللي يعجبني أروح له برجلي. أبوك كان مجرد كارت للهروب من الفقر والسهر، بس أنت؟ أنت حكاية تانية خالص.. الشقة جاهزة والمزاج متظبط؟ وريني بقى شقة الزمالك دي شكلها إيه، ونشوف مين فينا اللي هيعلم التاني الأدب!”
مسكها مندور من دراعها بقوة، بس المرة دي هي مكنتش بتميل معاكس؛ كانت ماشية جنبه بكبرياء وابتسامة شقية مرسومة على شفايفها. نزلا مع بعض للمرأب السري تحت العمارة، وفتح لها باب عربية سوداء فخمة جداً، ركبت بجرأة ورمت ضهرها على الكرسي وهي بتبص له من تحت لتحت.
طول الطريق للشقة اللي في قلب الزمالك، كان الهدوء هو السايد، بس النظرات بينهما كانت مولعة نار. مندور يسوق بعصبية وممسك الدركسيون بايده الشديدة، وهي قاعدة بتعدل مكياجها في مراية العربية وتدندن بصوت واطي وزي ما تكون رايحة نزهة مش مخطوفة!
وصلوا العمارة، ونزلوا في صمت لحد ما فتح باب الشقة. أول ما دخلت ليالي، عيونها اتسعت بذهول واستحسان؛ الشقة مكنتش مجرد مكان سكن، دي كانت مبنية للروقان والمزاج وبس! إضاءة خافته نبيتي، كنب جلد واسع ومريح، إكسسوارات شرقية أصلية، وسجاد يدوي فاخر، وفي الزاوية تربيزة أبانوس عليها طقم شيشة نحاس خالص وبيلمع.
شهقت ليالي بابتسامة أعجاب وقالت:
”لا يا مندور بيه.. الذوق يدرس بصراحة! الشقة دي تبين إنك راجل بتعرف تفصل ومزاجك عالي قوي.”
مندور سكت، وقفل باب الشقة بالضبة والمفتاح، وصوت التكة في القفل عمل رنة في المكان. لف وشاور بعينه على شنطة كبيرة كانت محطوطة على المائدة، وقال بصوت أمر ومفهوش ياما ارحميني:
”ادخلي دي.. هتلاقي جوا بدلة رقص. تتغيري وتطلعيلي وريني الإبداع اللي الحاج توفيق وخلاه هيبيع اللي وراه واللي قدامه عشانك.”
دخلت ليالي الأوضة من غير ما تردد أو تبين خوف، وبصت للبدلة اللي في الشنطة؛ كانت بدلة رقص متميزة جداً، جريئة ومتقفلة بذكاء، ألوانها بتخطف العين وتغير شكل اللي تلبسها تماماً.
في الوقت ده، خرج مندور للصالون، ولع فحم الشيشة وقعد على الكنبة الجلد العريضة، حط رجل على رجل، ومسك خرطوم الشيشة يشفط منه ويطلع دخان ثقيل بيملى جو الصالون برائحة المعسل الفاخر، وعينيه مستنية الباب يفتح.
بعد دقائق، اتفتح الباب.. وخرجت ليالي!
كانت طالعة بطلة مختلفة تماماً؛ البدلة رسمت تفاصيلها وجرأتها بطريقة تخطف الأنفاس، ومع حركة خطواتها الرزينة في نفس الوقت، النور الخافت عكس سحر عيونها. قربت منه بخطوات متناسقة مع رنة الخلخال في رجليها، وبصت له بجراءة كتفها مع بداية المزيكا الواطية اللي شغلتها من تليفونها.
مندور حط خرطوم الشيشة على جنبه وسند ضهره، عينيه بتراقب كل حركة بتعملها، والجمود اللي على وشّه بدأ يدوب واحدة واحدة قدام دلالها وذكائها في الرقص. كانت بتعمل كل حركة بيطلبها بنظرة عين أو إشارة بإيده، بمرونة تخلي أعتى راجل ينسى اسمه، وهي عينيها مش مفارقة عينيه، وبتقول له بنظراتها إن اللعبة دي.. هي اللي بتديرها بنفسها!
يتبع الفصل التاني رقاصة عرش قلبي بقلمي زهرة الثالوث
