جوزي طلب مني الدهب بتاعي عشان محتاجه، وأنا عارفة ظروفه وعارفة إنه مش عليه مديونيات. لكن استغربت لما قال إن بنت عمه هتطلق، وهو محتاج فلوس للمحامي عشان ترفع طلب انفصال، وإنه محتاج الدهب عشان أتعاب المحامي وعشان يجيب لها شقة تقعد فيها لحد ما تتم الإجراءات.
وقتها استغربت وقلت له: اشمعنى انت اللي تساعدها؟ ما عندها أبوها وأمها.
قال: لأ، هالة مش بس بنت عمي، دي حبيبتي القديمة، وأنا بعد انفصالها هتجوزها.
وقتها ضحكت بسخرية وقلت له: والمفروض بقى أساعدك؟ وأنا إيه اللي يجبرني أصلاً على كده؟ منا هطلب الانفصال ومش هتقدر تاخد مني حاجة.
قال: اطلبي الانفصال، وصدقيني انتِ هتخسري كل حاجة؛ لأني مرتب كل حاجة قبل ما أطلب منك الطلب ده. ولو عملتي كده أنا هطلقك وأقول للناس إن ابنك ده مش ابني، ووقتها شوفي بقى سمعتك انتِ وابنك، وشوفي هتعرفي تصرفي منين على ملفات وتحاليل عشان تثبتي إن كلامي غلط.
وبعدها قال: بصي يا فاطمة، أنا قرارى واخده، والدهب دلوقتي هتخشي تجبيه عشان يتباع. يا إما كده، يا إما انتي حرة بقى. إنما لو سمعتي كلامي بوعدك إن مافيش حاجة هتتغير، وهتفضلي برضه مراتى اللي بحبها.
بعد ما خلص كلامه، فضلت قاعدة مكاني فترة طويلة، مش قادرة أستوعب اللي سمعته، ولا قادرة أصدق إن الراجل اللي عايشة معاه كل السنين دي وصل بيه الأمر إنه يضغط عليا في ابني عشان واحدة تانية.
كنت كل ما أبص على ابني أحس بوجع أكبر، وأقول لنفسي: أنا ممكن أستحمل أي حاجة، لكن إزاي أسمح إن ابني يبقى طرف في خلاف بيني وبين أبوه؟ قررت أسمع كلامه على ما أفكر أعمل إيه.
تاني يوم جه وقالي: فين الحاجة؟ فتحت درج الدهب، وطلعت غويشتين من اللي عندي، واديتهم له وأنا حاسة إني بسلّمه جزء من عمري مش مجرد دهب. أخدهم وقال: كده إنتِ عاقلة، وأنا مش هنسى وقفتك دي معايا.
ما رديتش عليه، وكل اللي عملته إني دخلت أوضتي وقفلت الباب وعيطت، مش على الدهب، لكن على نفسي وعلى العشرة اللي بقيت فيها مضطرة أتنازل عشان أحافظ على ابني.
بعد يومين، كنت في المطبخ بجهز الغدا، وسمعت صوت المفتاح في الباب، وبعدها صوت جوزي بيتكلم مع واحدة. مسحت إيدي وخرجت أشوف مين، وفجأة لقيته داخل ومعاه هالة!
وقفت مكاني وبصيت لهم، وهالة كانت ماشية وراه وهي شايلة شنطة كبيرة، وباين عليها التوتر.
قلت له باستغراب: إنت جايبها هنا ليه؟
قال: عشان ماتقعدش لوحدها، وممكن جوزها يعرف مكانها، وأنا مفيش علاقة رسمية بيني وبينها تخليني أقعد معاها وأحميها، عشان كده هتقعد عندنا لحد ما مشكلتها تتحل.
بصيت له وأنا مش مستوعبة: يعني إيه هتقعد عندنا؟ إنت بتقول إيه؟ دي مش شقة فاضية، ده بيتي أنا وابني!
قال بضيق: اه، بعد الانفصال لما نتحوز هخدلها شقة تقعد فيها. إنما دلوقتي جوزها ممكن يوصلها ومحتاجة حد يحميها، عشان كده أنا جايبها تقعد معانا عشان ماسبهاش لوحدها وتفضل قصادى دايماً.
قال آخر كلمة وهو بيبصلها بحب وعشق، كأنه مش قادر يبعد عنها لحظة واحدة. مكنتش قادرة أتكلم ولا أعمل حاجة؛ لأني قلقانة على ابني وسمعته من رد فعل أبوه، ومش عارفة لسه أقف قصاده إزاي. وافقت وأنا مرغمى.
ومن وقتها هالة اعتبرت إن البيت بقى بيتها، واتجاهلت وجودي نهائي. وجوزي كان بيعاملها كأنها كنز، وهي عارفة نقطة ضعفه اللي بتخليه ينفذ لها أي طلب حتى لو مش منطقي.
وجوزي اعتبر هالة مراته مش بس بنت عمه. كل يوم خروج بحجة المحامي، لكنه كان بيفسحها كل يوم، هدايا، وأي أكلة نفسها فيها ينزل يجبهالها على طول عشان ما يخليش نفسها في حاجة.
كنت أدخل أنام وهما يسهروا بليل يتفرجوا على التلفزيون سوا. أخرج أقعد معاهم يتجاهلوا وجودي. كنت أشوف جوزي بيقشر لها اللب ويحطه في بقها، يأكلها الآيس كريم عشان أديها ماتلزقش، يخبي الشبسي والحلويات من ابني عشان يسهروا بليل يكلوها سوا، ولو وسخت أديها يقوم يبل الفوطة ويمسحلها أديها عشان ماتقومش وتتعب نفسها، وتفضل قاعدة تتفرج على الفيلم.
لما كانت تبقى عايزة تشرب نسكافيه، يطلب مني أقوم أعمله، وهي كانت تبصلي بخبث وتقوله: لأ، قوم انت، أنا عايزة أشربه من إيدك. وفي نفس اللحظة يقوم يعملها كل اللي هي عايزة.
لما جيت أتكلم أو اعترضت وقلت لها: اتقي الله، لقيته قام عليا وتخانق معايا وقال: دي ضفرها برقبتك، اعتذرلها حالاً. هالة دي اللي يزعلها ولا يقولها حاجة، كأنه بيزعلني لو عايزة تراضى وارضى عنك واعاملك حلو. شيلها فوق راسك.
وقتها فضلت قاعدة مع نفسي ومش عارفة أعمل إيه: أسمع كلامه عشان ابني، ولا آخد منه موقف وزى ما تيجى تيجى؟ فضلت طول الليل قاعدة أفكر، وكل ما أفتكر تعامله القاسي معايا قدام هالة أحس إن قلبي بيتحرق.
أنا عمري ما تخيلت إن جوزي اللي كنت فاكرة إنه سندي وأمان ليا، يوصل بيه الحال إنه يفرض سلطته عليا عشان يرضي واحدة تانية، والأغرب إنه مستني مني أعتذرلها كمان!
تاني يوم الصبح صحيت بدري، وجهزت الفطار لابني، ولما خرجت من الأوضة لقيت هالة قاعدة على السفرة بتفطر، وجوزي قاعد جنبها وبيصب لها الشاي.
بصتلي وقالت بابتسامة مستفزة: صباح الخير يا فاطمة، هو مفيش فطار تاني؟ أصل أنا مش بحب الجبنة دي.
بصيتلها وقلت بهدوء: الفطار اللي موجود ده اللي في البيت، واللي مش عاجبه يعمل لنفسه اللي هو عايزه.
وشها اتغير وبصت لجوزي، اللي حط كباية الشاي بعصبية وقال: إنتِ بتكلميها بالطريقة دي ليه؟ هالة ضيفة عندنا.
رديت وأنا ببصله: الضيف اللي بيحترم نفسه بنحترمه، إنما أنا مش خدامة عند حد، واللي عايز حاجة يقوم يعملها لنفسه.
هالة قامت من مكانها بسرعة وقالت: خلاص يا حبيبي، ماتتخانقش معاها عشاني، أنا هعمل لنفسي أي حاجة.
لقيته بيبصلها بحنان ويقول: إنتِ تقومي من مكانك ليه؟ اقعدي وأنا هعملك اللي إنتِ عايزاه. وبعدين بصلي وقال: إنتِ واضح إنك نسيتي الكلام اللي اتفقنا عليه امبارح، أنا مش هسمحلك تضايقي هالة في بيتي.
ضحكت بسخرية وقلت: بيتك؟ هو إنت اشتريته لوحدك؟ ده بيتي أنا وابني كمان، وبعدين أنا مش مضايقاها، أنا بس بقول إني مش خدامة عندها.
قرب مني وقال بصوت واطي: خلي بالك من نفسك يا فاطمة، إنتِ عارفة أنا ممكن أعمل إيه.
سكت، مش خوفًا منه المرة دي، لكن عشان ابني كان خارج من الأوضة وواقف بيتفرج علينا.
أخدت ابني ودخلت بيه أوضته، وفضلت طول اليوم أحاول أتصرف بشكل طبيعي قدامه، لكن جوايا كان فيه قرار بيتكون. أنا مش هفضل طول عمري عايشة تحت ضغطه، ومش هسيب ابني يكبر وهو شايف أمه بتتهان ومطلوب منها تسكت عشان أبوه يرضى عنها.
وبالليل، لما جوزي وهالة دخلوا أوضة الصالون وقعدوا يتفرجوا على التلفزيون، خرجت بالموبايل واتصلت بأختي الكبيرة. أول ما سمعت صوتها مقدرتش أتماسك وعيطت.
قالتلي بقلق: مالك يا فاطمة؟ إنتِ بتعيطي ليه؟ حصل إيه؟
حكيتلها كل حاجة، من أول ما طلب مني الدهب لحد ما جاب هالة تعيش معانا، وقلت لها كمان على ضغوطه عليا بسبب ابني.
