يوم رجوع ابني من الغربة، اكتشفت إن خطيبته بقت أهم عنده من أقرب الناس ليه! لما شفت الفرق في معاملته بينها وبين أخواته واللي سمعته بالصدفة بعد كده كشفلي سر مكنتش أتخيل إنه مخبيه عن أمه!
أنا أم عندي ولد وبنتين، وابني الكبير اسمه كريم، عنده تلاتين سنة، والبنتين أصغر منه، سارة عندها خمسة وعشرين سنة، ونور عندها اتنين وعشرين سنة.
كريم كان مسافر بره مصر بقاله حوالي سنة ونص، وكان كل ما يكلمني في التليفون يوعدني إنه أول ما ينزل مصر هيعوضني عن كل الأيام اللي فاتت، ويقعد معايا ويخرجني ويجيبلي اللي نفسي فيه.
وكنت بستنى اليوم ده بفارغ الصبر، مش عشان الهدايا ولا الفلوس، لكن عشان ابني اللي وحشني يرجع وأشوفه قدامي.
بس كريم رجع ومعاه خبر تاني شاغل كل تفكيره.
كان خاطب بنت اسمها يارا، اتعرف عليها من خلال أصحابه قبل ما يسافر، وبعد فترة اتفقوا إنهم يكملوا مع بعض، ولما نزل مصر قرروا يحددوا ميعاد الفرح.
أنا مكنتش معترضة على خطوبته، بالعكس، كنت فرحانة إن ابني هيستقر ويكون له بيت، وكنت بتعامل مع يارا بكل حب، وبحاول أخليها تحس إنها واحدة من بناتي.
لكن من أول ما ارتبط بيها وأنا ملاحظة إن كريم اتغير شوية.
مبقاش عنده وقت لينا زي الأول، وكل مكالمة لازم تنتهي بكلمة: «معلش يا ماما، يارا مستنياني».
كنت بقول لنفسي عادي، دي خطيبته ومن حقها تاخد من وقته، خصوصًا إنه كان بعيد عنها فترة طويلة.
لحد ما جه اليوم اللي رجع فيه من السفر.
من الصبح وأنا في المطبخ بجهز الأكل اللي بيحبه، وسارة ونور كانوا بيساعدوني في ترتيب البيت.
نور كانت كل شوية تبص من البلكونة وتسألني:«ماما، هو كريم قالك هيوصل الساعة كام؟»
ضحكت وقلتلها:«يا بنتي هو لسه طالع من المطار، سيبيه ياخد نفسه الأول».
سارة قالت وهي بتضحك:«أنا مش مستنياه عشان الأكل، أنا مستنياه عشان أشوف جابلي إيه من بره».
قولتلها:«ربنا يهديكي يا سارة، هو مش راجع من معرض هدايا!»
وفجأة سمعنا صوت مفتاح الباب.
جريت أفتح، ولقيت كريم واقف قدامي، وراه شنطتين كبار، وعلى وشه ابتسامة واسعة.
حضنته جامد، وفضلت أبوسه وأنا بقول:«وحشتني يا حبيبي، وحشتني أوي».
رد عليا وهو بيضحك«وإنتِ كمان يا ست الكل، وحشتيني جدًا».
البنات خرجوا يجروا عليه، وكل واحدة حضنته وفضلوا يضحكوا ويتكلموا معاه.
قعدنا كلنا في الصالة، وبدأ يفتح الشنط.
طلع علب شوكولاتة، شوية حاجات بسيطة، وبعدها طلع شنطة كبيرة جدًا، شكلها غالي، ومقفولة بعناية.
نور بصتله وقالت بحماس:«إيه دي يا كريم؟ شكلها فيها كنز!»
ضحك وقال«دي بقى أهم شنطة معايا».
سارة قربت منه وقالت«طب افتحها نشوف».
فتح الشنطة، وأول ما رفع الغطا ظهرت علب مخملية، وشنط صغيرة، وعلب برفانات، وساعات متغلفة.
البنات بصوا لبعض باستغراب، وأنا كمان اتفاجئت من كمية الحاجات اللي جواها.
سألته«ما شاء الله يا حبيبي، كل ده إيه؟»
رد بمنتهى الفخر:
«دي هدايا يارا، جبتلها شوية حاجات كانت نفسها فيها. شنطة من ماركة بتحبها، وساعتين، وبرفانات، وحاجات تانية».
نور ابتسمت وقالت بهزار:«يا سلام! أمال إحنا بقى فين يا عم كريم؟»
كريم بص لها وضحك:«إنتوا ليكم برضه، متقلقوش».
سارة سألت وهي بتبص على الشنطة:«طب فين هدايانا؟»
كريم سكت لحظة، وبعدين مد إيده على شنطة تانية صغيرة كانت جنب رجله وقال : «دي شنطة أخواتي».
البنات فرحوا وبدأوا يفتحوا الشنطة بحماس.
لكن الفرحة اختفت من وشوشهم في ثواني.
كان فيها شوية شوكولاتة، وعلبتين إكسسوارات بسيطة، وكام حاجة صغيرة ملهاش قيمة كبيرة.
نور مسكت علبة صغيرة وقالت: «هو ده كل اللي لينا؟»
كريم رد وهو بيقفل شنطة خطيبته:«أيوه، إنتوا عايزين إيه تاني؟ أنا جبتلكم حاجات حلوة أهو».
سارة حاولت تضحك وتعدي الموقف:«لا يا سيدي، كتر خيرك».
لكن أنا كنت شايفة عينيها، وشايفة نور اللي حطت الحاجة من إيدها وسكتت.
مش موضوع فلوس ولا قيمة الهدية، لكن الفرق كان كبير أوي، خصوصًا إن البنات عمرهم ما قصروا مع أخوهم، وكانوا بيستنوه أكتر مني تقريبًا.
حاولت أغير الموضوع، وقلت لكريم : «طب يا حبيبي، ورينا باقي الحاجات اللي جبتها».
لكنه كان مشغول بالموبايل، وكل شوية يرد على رسائل يارا.
بعد شوية، دخلت المطبخ أجيب العصير، ولقيت سارة داخلة ورايا.
كانت بتحاول تبان عادية، لكنها كانت متضايقة.
قالتلي بصوت واطي:«ماما، هو إحنا زعلناه في حاجة؟»
بصيتلها باستغراب:«ليه بتقولي كده يا حبيبتي؟»
ردت وهي بتحاول تمنع دموعها : «أصل أنا مش فاهمة، يعني هو جايب لخطيبته كل ده، وإحنا حتى مافتكرش يجيب لكل واحدة حاجة على ذوقها».
نور دخلت وراها وقالت: «أنا مش فارق معايا الهدية يا ماما، بس كنت مستنية يحسسنا إننا وحشناه زي ما هي وحشاه».
الكلام ده وجع قلبي أكتر من أي حاجة.
خرجت من المطبخ ورجعت للصالة، ولقيت كريم لسه فاتح شنطة يارا، وبيصور الحاجات عشان يبعتها لها.
وقتها أخدت قرار من غير ما أفكر كتير.
قولت للبنات:«تعالوا يا حبايبي، اختاروا كل واحدة حاجة تعجبها من شنطة يارا».
كريم رفع راسه بسرعة وبصلي باستغراب : «إنتِ بتقولي إيه يا ماما؟»
قولتله بهدوء:«بقول للبنات يختاروا حاجة، ما هي خطيبتك لسه ماشافتش الهدايا، وإنت تقدر تجيبلها غيرها».
وشه اتغير تمامًا. حصري علي روايات واقتباسات
قفل الشنطة بعصبية وقال:«لأ، محدش يلمس حاجة من الشنطة دي!»
سارة اتكسفت ورجعت خطوة لورا، ونور بصت للأرض.
أنا اتضايقت من طريقته وقلتله:«إيه يا كريم؟ دول أخواتك، مش ناس غريبة. وبعدين إحنا مش بنسرق حاجة، أنا بقولهم يختاروا هدية واحدة».
رد بصوت عالي:«يا ماما، أنا جايب الحاجات دي من فلوسي، ومحدش له دعوة أنا أديها لمين!»
سكتنا كلنا.
أنا عمري ما كنت بحاسبه على فلوسه، ولا عمري طلبت منه يجيبلي حاجة، لكن طريقته كانت جارحة جدًا.
قولتله:«محدش قالك تصرف فلوسك في إيه، بس متخليش بناتك يحسوا إنهم أقل من واحدة لسه داخلة العيلة».
رد بعصبية:«يارا خطيبتي، ومن حقي أفرحها، ومش معنى إني جبتلها هدايا إنكم تقعدوا تحاسبوني!»
سارة دخلت الأوضة وهي بتعيط، ونور قامت وراها.
أما أنا ففضلت واقفة مكاني مش مصدقة إن ده ابني اللي كنت مستنياه من سنة ونص.
بعد شوية، كريم دخل أوضته وقفّل الباب.
حاولت أهدى نفسي وأقول يمكن السفر غيره، ويمكن هو متوتر بسبب تجهيزات الفرح.
لكن اللي حصل بعد كده كان أغرب.
الساعة قربت من نص الليل، وكنت داخلة أحط له العشا على المكتب، سمعت صوته بيتكلم في التليفون.
كان بيتكلم مع يارا، وصوته المرة دي كان هادي جدًا.
قالها:«متقلقيش، أنا اتصرفت. محدش هيقرب من حاجتك تاني».
وقفت مكاني لما سمعت يارا بتسأله:«طب ومامتك؟ عرفت حاجة؟»
رد كريم بسرعة:«لأ، ولسه مش هتعرف. أنا هخلص الموضوع ده قبل الفرح».
حسيت إن قلبي وقع في رجلي.
إيه الموضوع اللي ماما مش المفروض تعرفه؟
وليه يارا بتسأله إذا كنت عرفت ولا لأ؟
رجعت خطوتين لورا من غير ما يحس بيا، لكن قبل ما أمشي سمعت كريم بيقول جملة خلت الدم ينشف في عروقي:«أنا مش خايف من زعل أخواتي، أنا خايف بس إن ماما تكتشف إن الفلوس اللي اشتريت بيها كل الهدايا دي مش فلوسي أصلًا… دي فلوسها هي!»
