
خلينا نحافظ على الاحترام اللي باقي بينا، وكل واحد يكمل حياته. وربنا يوفقك. وقبل ما ألحق أرد، أنهت المكالمة.
فضلت ماسك الموبايل وأنا حاسس إني اتصفعت. كنت متخيل إنها أول ما تعرف إني ندمان هتوافق ترجع، زي ما كنت متعود منها إنها تسامحني وتعدي، لكني اكتشفت إن فيه حاجات لما بتتكسر، حتى لو اتصلحت، عمرها ما بترجع زي الأول.
عدت فترة طويلة بعد المكالمة دي، وأنا بحاول أرتب حياتي، لكن شروق فضلت على موقفها، ومرفضتش ترجعلي مرة واحدة بس، إنما كانت كل مرة بتأكدلي إن قرارها نهائي، وإنها عايزة تعيش في سلام بعيد عني. وبعد مدة، عرفتئنها اتخطبت، وبعدها اتجوزت راجل تاني.
الخبر نزل عليَّ تقيل، رغم إني أنا اللي طلقتها، وأنا اللي خرجتها من حياتي. كنت متخيل إنها هتفضل لوحدها فترة طويلة، أو يمكن كنت جوايا جزء أناني فاكر إنها هتفضل مستنياني أرجع وأطلب منها السماح. لكنها اختارت تكمل حياتها، وكان من حقها تعمل كده.
بعد جوازها، شروق كلمت بابا، واتفقوا إنها ترجعله الشقة، لأنها كانت عايزة تبدأ حياتها الجديدة من غير ما تفضل مرتبطة بالمكان اللي عاشَت فيه معايا. ولمَّت كل العفش بتاعها وحاجتها، وخدت كل حاجة تخصها، ورجعت الشقة لبابا زي ما اتفقوا. ولما بابا عرف إنها خلصت كل حاجة، قالي:
شروق سابت الشقة، ورجعتها لي زي ما كانت، وخدت عفشها كله.
بصيتله وسألته:
يعني إيه؟ هي خدت العفش كله؟
رد عليَّ:
أيوه، العفش اللي كان بتاعها واللي من حقها تاخده. إنت كنت متوقع تسيبلك كل حاجة وتمشي؟ البنت بدأت حياة جديدة، ومن حقها تاخد حاجتها معاها.
سكت، ومكنش عندي حاجة أقدر أقولها. أنا اللي كنت طردتها بشنطة هدومها، وهي لما خرجت من حياتي نهائي، خدت حقها ومشيت من غير ما تستنى مني حاجة. بعدها بفترة، بدأت أفكر في الجواز مرة تانية.
كنت مقتنع إن مشكلتي مش في الجواز نفسه، وإن اللي حصل مع شروق كان غلطة وانتهت، وإن المرة دي هختار واحدة مناسبة ليا، ونقدر نبدأ مع بعض من غير مشاكل. واتجوزت فعلًا، لكن المرة دي مكنتش داخل الجواز بنفس الثقة اللي كنت داخل بيها أول مرة.
في البداية، كل حاجة كانت ماشية كويس، وبعد فترة بدأت تظهر المشاكل. طلبات كتير، ومصاريف أكبر من قدرتي، وخلافات على تفاصيل صغيرة كانت بتكبر يوم بعد يوم. كنت أحاول أوفر كل اللي أقدر عليه، لكن دايمًا كان فيه حاجة ناقصة، ودايمًا كنت بحس إني مطالب بأكتر من طاقتي.
ومع كل خناقة، كنت أرجع أقارن بين حياتي دلوقتي وحياتي القديمة مع شروق، رغم إني كنت عارف إن المقارنة مش عادلة، وإن شروق كانت بتستحمل حاجات كتير أنا مكنتش حتى واخد بالي منها. كنت أفتكر إنها عمرها ما كانت بتضغط عليَّ بطلبات فوق قدرتي، وإنها كانت بتحاول تساعدني على قد ما تقدر، وإنها كانت بتراعي ظروفي حتى وأنا مش بقدرها.
لكن المرة دي، لما بقيت أنا اللي محتاج حد يراعي ظروفي، اكتشفت إن الحياة مش دايمًا بتمشي بالطريقة اللي إحنا عايزينها. وفي ليلة، بعد خناقة جديدة بسبب المصاريف، قعدت لوحدي وبصيت للسقف، وافتكرت كلام أبويا يوم ما قالي إن عدم كتابة القايمة مش معناه إن الإنسان يقدر يظلم مراته من غير ما يتحاسب.
وقتها فهمت إن المشكلة عمرها ما كانت في القايمة، ولا في الشقة، ولا حتى في هنا اللي سابتني. المشكلة كانت فيَّ أنا، في إني كنت فاكر إن من حقي أخد كل حاجة على مزاجي، وإن الناس اللي بتحبني هتفضل مستحملاني مهما عملت.
لكن شروق علمتني درس عمري ما هنساه، حتى من غير ما تقصده. أنا اللي طلقتها وأنا فاكر إني بكده كسبت حياتي، وبعد ما خسرتها، فضلت أدور على الراحة اللي كانت بتحاول تديني إياها وأنا مش شايفها.
ولما أخيرًا فهمت قيمتها، كانت هي خلاص اختارت تعيش حياتها بعيد عني، وأنا مكنش ليا حق ألومها على اختيارها.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”



