روايات وقصص

رشا خالد

لفيت ناحية عم حسن وقلتله:
يا عم حسن، عقد الإيجار بتاع حضرتك ساري زي ما هو، ومفيش أي تغيير في الاتفاق بيني وبينك. محدش من حقه يطلب منك تمشي أو يغير أي حاجة في المحل من غير موافقتي أنا.

عم حسن اتنفس براحة، وهز راسه وقال:
حاضر يا أستاذة سارة، أنا كنت خايف أدخل نفسي في مشكلة بينكم.

مريم صرخت:
يعني إيه؟! أنا دفعت فلوس حجز اسم البراند بتاع فساتين الأفراح، واتفقنا على كل حاجة! إنتِ كده هتضيعي عليا فلوسي!

بصيتلها وقلت:
روحي للي وعدك بالمحل وخدي منه فلوسك. أنا مش مسؤولة عن اتفاقات إنتِ عملتيها على حاجة مش ملكك.

المهندس اللي كان معاهم بدأ يجمع حاجته بسرعة، وقفل الكاميرا وقال:
أنا آسف، بس طالما ملكية المكان مش محسومة، إحنا مش هنقدر نكمل التصميم أو نستلم المشروع قبل ما الأوراق تبقى واضحة.

كريم وشه اتغير، وبص لمريم بغضب مكتوم:
مريم، هو إنتوا اتفقتوا في البيت على إيه بالضبط؟ أنا فاهم من امبارح إن الموضوع محسوم، وإن المحل هيتنقل باسمك بعد الجواز!

مريم ردت بسرعة وهي بتشاور عليّ:
ما هو كل حاجة كانت تمام، لولا إنها قررت تعاندني وتمنعني من حقي!

بصيتلها باستنكار:
حقك إيه؟ المحل اللي أهلي اشتروهولي بفلوسهم قبل ما أتجوز أخوكي بقى حقك؟!

كريم بدأ يشك في الكلام اللي اتقال له، وبص ناحية عم حسن، وبعدين رجع بص لمريم:
طيب، فين عقد الملكية؟ فين الورق اللي يثبت إن المحل اتنقل ليكي أو إن سارة وافقت تتنازل عنه؟

مريم سكتت للحظة، ومقدرتش ترد.
أما أنا، فاتجهت ناحية الباب وفتحته على آخره، وبصيت لهم جميعًا وقلت بحزم:
المحل ده ملكي أنا، ومحدش منكم له أي حق يتصرف فيه. ياريت تتفضلوا بره، وكل واحد يروح يحل مشاكله بعيد عن ممتلكاتي.

ولأول مرة من ساعة ما بدأت الحكاية، مريم ماكانش عندها رد جاهز، وكريم بدأ يفهم إن العيلة اللي وعدته بمحل كامل، يمكن تكون وعدته بحاجة عمرها ما كانت ملكها من الأساس!

حمايا قرر يطردني من بيتي عشان يرضّي أهل العريس!
أول ما مريم خرجت من المحل، وهي بتترعش من الغضب، موبايلي رن.
كان أحمد.
رديت، فسمعته بيزعق من أول كلمة:
إنتِ عملتي إيه يا سارة؟!

بعدت الموبايل عن ودني شوية، وبعدين رديت بهدوء:
صباح الخير يا أحمد. إنت بتتكلم عن أنهي حاجة بالضبط؟

قال بعصبية:
إنتِ طردتي مريم وكريم والمهندس من المحل قدام بعض! إنتِ فاهمة إنك كده فضحتينا؟!

بصيت لعم حسن، اللي كان بيحاول يرجع البضاعة لمكانها، وقلت:
أنا مطردتش حد من مكانه. أنا بس منعت ناس تدخل ملكي وتتصرف فيه من غير إذني.

أحمد صرخ:
ما هو أبويا قال إن المحل لمريم!

أبوك قال كلام من غير ما يرجعلي، وأنا وضحت الحقيقة. فين المشكلة؟
سكت ثواني، وبعدين قال بنبرة تهديد:
إنتِ استني لما أرجع البيت، إحنا لينا كلام كتير.

قفلت المكالمة من غير ما أرد.
كنت عارفة إن اللي حصل مش هيقف عند كده، لأن المشكلة عمرها ما كانت مجرد محل. المشكلة إن عيلة جوزي اتعودت تعتبر سكوتي موافقة، وتعتبر تنازلاتي حق مكتسب لييهم.
لكن المرة دي، أنا مش هسكت.

بعد أقل من ساعة، كنت لسه في المحل براجع مع عم حسن بعض الحسابات، لما لقيت عربية حمايا وقفت قدام المكان.
نزل محمود من العربية، ووراها نزلت حماتي نادية، وأحمد ومريم.
مريم كانت عينيها حمرا من العياط، لكنها أول ما شافتني رفعت صوتها وقالت:
هي دي بقى اللي هتخليني أطلق قبل ما أتجوز؟!

كريم ماكانش معاهم.
استغربت غيابه، لكني ما علقتش.
حمايا دخل المحل بخطوات سريعة، وبص لعم حسن وقال:
إنت يا عم، اتفضل بره شوية. إحنا عندنا كلام عائلي.

عم حسن بصلي، فهزيت راسي وقلتله:
خليك مكانك يا عم حسن. ده محلك اللي مأجره بعقد قانوني، ومحدش من حقه يطلب منك تمشي.

وش حمايا احمر:
إنتِ بتعملي إيه بالضبط يا سارة؟! هو أنا بقيت غريب عشان كلامي ميتسمعش؟!

رديت:
حضرتك أبو جوزي، وليك كل الاحترام، لكن ده مش معناه إنك تقدر تتصرف في ملكي.

مريم شهقت وقالت:
يا بابا، شايف؟! هي بتكلمك كأنك واحد غريب!

حماتي قربت مني، وحاولت تمسك إيدي:
يا بنتي، عشان خاطري، إحنا مش عايزين مشاكل. مريم دفعت فلوس، واتعلقت بالمشروع، ومش معقول تضيعي عليها تعبها.

سألتها:
هي دفعت لمين يا ماما؟

حماتي سكتت.
كررت سؤالي:
دفعت لمين؟ ليا أنا؟ ولا لأبوها؟ ولا لشركة تجهيزات المحل؟

مريم ردت بسرعة:
أنا دفعت فلوس حجز اسم البراند والتصميمات!

طيب، هل دفعتيلي إيجار أو تمن المحل؟
لأ، بس بابا وعدني!

يبقى روحي اتفاهمي مع بابا.
حمايا ضرب كف بكف، وقال:
إنتِ عايزة إيه عشان تخلصي الموضوع؟!

بصيتله باستغراب:
أنا؟ أنا مش عايزة حاجة. أنا عايزة كل واحد يلتزم بحدوده، والمحل يفضل ملكي زي ما هو.

رد بعصبية:
يعني هتسيبي أخت جوزك تتبهدل بسبب شوية ورق؟!

قلتله:
مش شوية ورق يا بابا. دي ملكية كاملة، وأهلي دفعوا فيها فلوس تعبهم. حضرتك لو كنت عايز تساعد مريم، كان ممكن تديلها فلوس أو تشتريلها محل تاني، لكن مينفعش توعدها بحاجة مش بتاعتك.

فجأة، أحمد اتدخل:
خلاص يا سارة، اعتبري الموضوع انتهى. إحنا هنحلها بيننا وبين بعض، وإنتِ ارجعي البيت.

بصيتله وقلت:
هنحل إيه؟ إنتوا جايين هنا ليه أصلًا؟

قال:
عشان أبويا عايز يتكلم معاكي.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى