لكن أول ما نزلت آخر درجة، كل الأصوات بدأت تهدى. ستات قاعدين على الكنب بصوا ناحيتي، ورجالة كانوا بيتكلموا جنب باب المجلس سكتوا فجأة. وفي نص الصالون، كان فيه راجل كبير، ملامحه حادة وشنبه أبيض، قاعد على كرسيه كأنه صاحب المكان وصاحب الكلمة الأخيرة فيه.
جنب منه ست أنيقة، أول ما شافتني، بصتلي باستغراب واضح. أما العريس المزعوم، فوقف جنبي وقال بكل ثقة: ـ صباح الخير يا حاج. أحب أعرفكم… دي البنت اللي أنا اخترتها. الراجل الكبير رفع عينه ببطء، وبصلي من فوق لتحت، وبعدها حط فنجان القهوة على الترابيزة وقال: ـ اخترتها إنت؟
! من إمتى وإنت بتختار يا ولدي؟! رد من غير ما يتردد: ـ من النهارده يا أبوي. الراجل ضيق عينيه، وبعدين وجه كلامه ليا: ـ اسمك إيه يا بنتي؟ لسة كنت هـ أرد، لكن في اللحظة نفسها، سمعنا صوت بنت جاي من ورا ضهرنا، صوت أعرفه كويس، صوت كنت مستنياه من ساعة ما دخلت البيت.
ـ اسمها مريم يا عمي… بس قبل ما حضرتك تسألها عن اسمها، في حاجة لازم تعرفها. اتجمدت مكاني. لفيت بسرعة، ولقيت صاحبتي واقفة عند باب الصالون، وشها شاحب وعينيها مليانة خوف. بصيتلها بصدمة وقولت :إنتِي كنتِي فين يا بنتي؟! وإيه اللي بيحصل ده؟! لكنها ما بصتليش حتى.
كانت عينيها متعلقة بالعريس، اللي ابتسامته اختفت لأول مرة من ساعة ما شوفته. أما الحاج، فقام من مكانه ببطء وقال بلهجة خلت كل اللي في الصالون يسكت: ـ اتفضلي يا بنتي… قولي اللي عندك. صاحبتي بلعت ريقها، وبصتلي لحظة، وبعدها قالت الجملة اللي قلبت وش العريس في ثانية: ـ يا عمي، البنت اللي ابنك فاكر إنها عروسته.
.. مش هي البنت اللي إنتوا جايبينها عشان يتجوزها! سكت المكان كله. العريس بصلي، وبعدين بص لصاحبتي، وقال بصوت منخفض لكنه مليان غضب: ـ يعني إيه مش هي؟! صاحبتي رفعت راسها، وردت وهي بتحاول تثبت صوتها: ـ يعني البنت اللي إنت شوفتها قررت تتجوزها من غير ما تعرف حتى اسمها.
.. دي صاحبتي أنا، وجاية معايا زيارة، ومالهاش أي علاقة بالجوازة اللي أبوك مرتبها! الحاج ضرب بعصاه على الأرض، وصوته علي في الصالون: ـ أية اللي بيحصل هنا دا ؟! العريس ما ردش. فضل باصصلي، وكأن الكلام اللي سمعه مش قادر يستوعبه، وبعد لحظات قرب مني خطوة وقال: ـ يعني كل اللي قولتيهولي كان حقيقي؟
! إنتِي فعلًا مش عارفة أنا مين، ولا كنتِي جاية تقابليني؟!عقدت دراعاتي قدام صدري وقلت بحدة: ـ أيوه! وكنت عايزة أخرج من الحمام من غير ما أعملك مشكلة، لكن واضح إنك إنت اللي عملتلي مشكلة بحجم الصعيد كله! لأول مرة ابتسم رغم الموقف لكن ابتسامته ما كملتش وقال.
…….#انجي_الخطيباتسمرت مكاني، وحسيت إن رجلي مش شيلاني، وبصيت لهبة وأنا مش فاهمة حرف واحد من اللي بيتقال. ـ جواب إيه يا هبة؟! أبوكي مات من سنين، إيه علاقتي أنا بجواب أبوكي؟! هبة حطت إيديها على وشها وانهارت في العياط، بينما كريم فضل واقف بابتسامته المستفزة، كأنه مستمتع إنه بيشوفنا كلنا
سليم مسك الموبايل من إيده فجأة وقال بحدة: ـ إنت هتفضل ترمي كلام وتخوف الناس لحد إمتى؟! اتكلم كلام واضح! كريم حاول ياخد الموبايل منه، لكن سليم رفع إيده ومنعه. ـ ابعد إيدك يا سليم! ـ لما تتعلم تتكلم بأدب في بيت أبويا، ابقى مد إيدك.
الحاج صبري قام من مكانه بصعوبة، وعينيه كانت متعلقة بالموبايل. ـ يا كريم، التسجيل ده جبته منين؟ كريم بصله بثقة وقال: ـ من المكان اللي حضرتك فاكر إنه محدش يعرف عنه حاجة. الحاج صبري اتغير لونه، ونوال حطت إيدها على صدرها.
أما أنا، فكنت حاسة إن فيه حاجة غلط، حاجة أكبر من قدرتي على الفهم، لكني ما كنتش مستعدة أسمح لحد يرميني في نص حكاية ما تخصنيش من غير ما أعرف حقيقتها. اتقدمت خطوة وقلت: ـ أنا مش هتحرك من هنا قبل ما أفهم.
كريم، إنت بتقول إني خبّيت جواب أبو هبة؟ إمتى؟ وفين؟ وإنت تعرفني منين أصلًا؟ بصلي من فوق لتحت وقال: ـ إنتِ متعرفيش، بس أنا أعرف عنك حاجات كتير. ـ زي إيه؟ ابتسم. ـ زي إن والدك الله يرحمه كان شريك قديم للحاج صبري، وإن فيه ورق اختفى قبل ما يتوفى، وإن الورق ده لو ظهر، ممكن ناس كتير تخسر كل اللي معاها.
بصيت للحاج صبري، ولقيته شاحب بشكل يخوف. ـ بابا كان شريك مين؟! سليم لف ناحيتي بسرعة. ـ إنتِ ما تعرفيش إن والدك كان شريك أبويا؟ هزيت راسي وأنا مش قادرة أستوعب. ـ بابا كان موظف حسابات في شركة صغيرة في القاهرة، ومات وأنا عندي سبع سنين.
طول عمرنا عايشين على قدنا، وماما عمرها ما قالتلي إن ليه شراكة مع حد. الحاج صبري قعد على كرسيه تاني، كأنه فجأة كبر عشرين سنة. ـ الله يرحمه عماد… كان راجل أمين، وعمره ما أكل حق حد. كريم ضحك بسخرية.
ـ أهو ده اللي إحنا بنقوله من سنين! بس يا ترى لو كان أمين أوي كده، ليه اختفى الورق اللي يثبت حسابات الشركة؟ سليم قرب منه، وصوته بقى أخطر. ـ إياك تتكلم عن الراجل ده بالطريقة دي من غير دليل. ـ إنت مالك؟
! هو أبوك اللي علمك تدافع عن الغريب وتسيب ابن عمك؟ ـ أنا بدافع عن الحق، واللي مش عاجبه يثبت العكس. في اللحظة دي، نوال قامت من مكانها، ومشيت ناحيتي، ومسكت إيدي بحنان. ـ تعالي يا بنتي، اقعدي هنا. إنتِ مالكيش ذنب في اللي بيحصل.
كنت محتاجة حد يقولي الجملة دي أكتر ما كنت متخيلة. قعدت جنبها، وأنا بحاول أمنع دموعي تنزل. لكن هبة فجأة رفعت راسها وقالت: ـ أنا اللي خبيت الجواب. كلنا بصينا لها. كريم ابتسامته اختفت. ـ إنتِ بتقولي إيه يا هبة؟
